Söngvarinn Justin Bieber er sagður í töluverðu uppnámi eftir að athafnamaðurinn og rapparinn Sean „Diddy“ Combs var handtekinn og ákærður fyrir mansal. Mun Bieber hafa lokað sig af og hafa aðstandendur áhyggjur af andlegri heilsu hans.

Diddy er meðal annars sakaður um að hafa fengið kvenkyns þolendur og karlkyns kynlífsverkamenn til að taka þátt í fjöldakynlífi undir áhrifum fíkniefna. Kallaði hann þessar orgíur „freak offs“.

Heimildarmaður úr nærumhverfi Bieber segir við DailyMail að Bieber sé sleginn út af handtökunni og þeim þungu sökum sem Diddy er borinn. Hann eigi erfitt með að ná utan um þetta enda hafi hann seinast átt í samstarfi við Diddy í tónlistarheiminum fyrir tæpu ári.

„Bieber er verulega miður sín út af fréttunum af Diddy og neitar að horfast í augu við þetta eða ræða þetta við nokkurn mann svo hann er búinn að loka sig af.

Svo mikið af fólkinu sem hjálpaði Bieber að verða stjarna er mjög náið Diddy og því er hann alveg sleginn út af laginu. Justin hefur ekki horfst í augu við þetta síðan lögregla gerði húsleit á heimilum Diddy og hann mun ekki gera það úr þessu.“

Heimildarmaðurinn segir að Bieber dauðsjái eftir því að hafa unnið með Diddy í fyrra og hefði aldrei gert slíkt hefði hann vitað hvað væri í vændum.

„Hann tók þátt í nýjustu plötu Diddy og hefði hann vitað þetta hefði hann aldrei gert það.“

Diddy hefur neitað sök í málinu en dómari hafnaði því að leyfa honum að sleppa úr gæsluvarðhaldi gegn greiðslu tryggingar. Hann er sakaður um að hafa notað völd sín og frægð til að lokka til sín konur og þvinga þær til þátttöku í kynlífsathöfnum.