Zak Nelson og Elliot Griffiths ætla að ferðast til Íslands í október. Slíkt væri kannski ekki í frásögu færandi, en þetta er önnur ferð breska parsins til landsins á þessu ári.
Sú fyrri í apríl endaði ekki vel en parið lenti í hörðum árekstri á hringveginum fljótlega eftir komuna til landsins. Zak slapp vel frá árekstrinum en Elliot ekki og lá hann á Landspítalanum í nokkurn tíma áður en hann komst heim. Hvorugur náði því að upplifa mikið af landinu.

„Við erum að koma aftur til Íslands! Við erum nýbúnir að bóka ferð, af hverju? Við erum búnir að spyrja sjálfa okkur að því nokkrum sinnum, líka eftir að við bókuðum ferðina. Kannski verðum við með svar þegar við komum heim,“ segir Zak.

Sjá einnig: Komnir heim til Bretlands eftir hörmulegt slys á Íslandi

Hann segir þá vera að leita að rólegu og góðu hóteli þar sem þeir geta eldað og haft það rólegt.

„Okkur finnst mikilvægt að koma aftur á staðinn þar sem þetta gerðist til að takast á við sálræna áfallið, að Ísland sé vondur staður, af því að landið er það ekki,“ segir Zak. Hann segist hafa fengið að sjá og upplifa Reykjavík á þremur og hálfri viku, en Elliot vilji sjá borgina enda hafi hann nær ekkert séð af henni sökum sjúkrahúsdvalarinnar.

Parið ætlar að heimsækja Landspítalann og segir Zak að hann hefði kannski ekki átt að segja frá því þar sem það átti að koma á óvart, en margir af starfsfólkinu fylgi honum á TikTok þannig að þau muni sjá það „Við viljum heilsa öllum yndislegu hjúkrunarfræðingunum og læknunum,“ segir Zak, sem bað Elliot á spítalanum.

Hann tekur fram að þeir ætli ekki að leigja bíl heldur nota almenningssamgöngur og skoða helstu áfangastaði borgarinnar.

„Við munum vonandi græða sárin en við erum líka dálítið stressaðir,“ segir Zack og Elliot tekur undir það. „Sjáumst fljótlega.“

@busman_zak we’re coming back to Iceland! #iceland #ísland #rtc #mva #carcrash #crash #survivor #survivors #fyp #fyf #mentalhealth #healing ♬ Wonderful Day – Satria Petir