DV heyrði í Kleina til að forvitnast um hvað hefði gengið svona vel, en margir bíða spenntir eftir að vita hvaða fyrirtæki hann og unnusta hans, Hafdís Björg Kristjánsdóttir, eru að koma á laggirnar hérlendis.
Kleini sagði í samtali við DV að hann gæti ekki gefið upp allt en var tilbúinn að deila smá með okkur.
„Um helgina munum við fagna okkar nýjasta sigri til þessa, því eftir langar samningaviðræður við erlenda viðskiptajöfra þá hefur loksins náðst samkomulag fyrir okkar framtíðarplan,“ sagði hann.
Áhugasamir þurfa að bíða aðeins lengur en þau munu gefa frekari vísbendingar um hvers sé að vænta á samfélagsmiðlum sínum á næstunni.
Smelltu hér til að skoða Instagram hjá Hafdísi og Instagram hjá Kleina, sem er einnig með TikTok.
Athafnaparið hefur haldið sig til hlés frá sviðsljósinu undanfarna mánuði, sérstaklega Kleini sem hefur verið í pásu frá samfélagsmiðlum síðan í lok júlí í fyrra. Þau voru gestir í Fókus, spjallþætti DV, í febrúar og ræddu um pásuna, hvað þau hafa verið að gera og hvað sé fram undan.
Þau sögðu að fyrsti mánuðurinn hafi farið í að „leggja niður planið“ og skipuleggja. „Við nýttum tímann sjúklega vel. Við vorum að ferðast og kúpla okkur frá áreitinu. Við gerðum helling,“ sagði Hafdís.
„Við vorum að gera samninga úti, gerðum samninga hérna heima. Öll tölvuvinna, þetta tók engan tíma því maður var ekki með hugann í öllu hinu.“
Þau vildu ekki gefa of mikið upp um hvers konar samninga, við hvern og um hvað en gáfu nokkrar vísbendingar.
„Við erum að gera samninga um alls konar. Við erum að fara að opna fyrirtæki,“ sagði Hafdís.
„Við ætlum að opna nokkur ný batterí á Íslandi, við getum orðað það þannig,“ sagði Kleini. „Aðeins að bjóða upp á meira á þessum litla klaka okkar.“
