Leikstjórinn og leikkonan Jodie Foster segist hafa upplifað sína verstu martröð við upptökur á þáttunum True Detective á Íslandi. Var hún látin falla í gegnum fullan vatnstank í algjöru myrkri.

Foster, sem er 61 árs gömul, lýsir reynslu sinni í viðtali við tímaritið Variety. En auk þess að leikstýra þáttunum, lék hún lögreglukonuna Liz Danvers.

Í atriðinu fellur Danvers í gegnum ís. Hún var látin falla ofan í vatnstank, 45 metra djúpan, þar sem var algert myrkur. Þar að auki voru fötin hennar þyngd svo hún myndi falla hraðar.

„Að falla í gegnum ísinn. Ég sagði alltaf: Hvernig ætlum við að gera þetta? Og þau sögðu: Oh, það kemur í ljós,“ sagði Foster um samtöl sín við tæknifólkið um hvernig ætti að útfæra atriðið.

„Ég vann með kafara sem sagði mér hvernig ætti að halda niður í mér andanum til að komast niður. Hann var til hliðar. Þegar var sagt „Klippa!“ þá synti hann til mín til að bjarga mér,“ sagði Foster. „Þeir þyngdu jakkann svo ég gæti ekki farið að yfirborðinu og ég var í stórum stígvélum. Ég hafði hins vegar ekki áttað mig á því að ég gat ekki séð neitt fyrir framan mig. Þetta var í raun mín versta martröð. Þegar þú heldur að eitthvað verði slæmt er það yfirleitt mun skárra en þú heldur. En ekki í þetta skipti. Þetta var slæmt.“

Að öðru leyti lýsti Foster reynslunni hér á Íslandi sem góðri. Nokkuð krefjandi hafi verið að taka svo lengi upp í kuldanum en það hafi samt vanist, einkum með góðum hitapokum innanklæða.

„Það er spiluð lifandi tónlist alls staðar. Maturinn er gómsætur. Það eru jarðhitaðar sundlaugar alls staðar. Í stað þess að fara á barinn ferðu í sund,“ sagði hún.