„Þegar ég greinist þá fer ég að átta mig á því hvaða hlutir skipta í raun máli í lífinu. Og hlutir sem maður var að velta sér upp úr eða pirra sig yfir áður, skipta engu máli í dag í stóra samhenginu,“

segir Melrós Eiríksdóttir sem var 33 ára og einstæð tveggja barna móðir þegar hún greindist með 4. stigs leghálskrabbamein. Við greininguna fannst Melrósu eins og einhver væri búinn að hrifsa af henni lífið sem hún vildi lifa. Hún fékk mikinn stuðning frá sínum nánustu en fannst á sama tíma undarlegt að allt í einu væru aðrir farnir að sinna þeim verkefnum sem hún myndi undir eðlilegum aðstæðum geta sinnt.

„Kraftur var bara fyrsti staðurinn sem ég hugsa um þegar ég greinist. Þú veist alltaf að það er traustur vinur þarna sem þú getur alltaf leitað til sama hvað er,“ segir Melrós sem leitaði strax til Krafts og fann að þar var öruggt svæði og yndislegur staður. Þar gæti hún líka talað um það sem hún væri hræddust við sem hún gat ekki endilega talað um við sína nánustu um.

Melrós þurfti að flytja aftur heim til foreldra sinna með börnin svo þau gætu sinnt þeim þegar hún var sem veikust í lyfjameðferðinni. Melrós segir að öll framtíðarplön hafi fokið út um gluggann við greininguna og þau plön sem hún hafði þá hafi hún ekki lengur því maður fái allt aðra sýn á lífið eftir svona reynslu og greiningu. Í dag er Melrós í viðhaldsmeðferð og að vinna í því að ná lífinu sínu til baka bæði andlega og líkamlega.

„Það er gott að sjá aðra með armbandið úti í samfélaginu, það bæði minnir mig á bara ef maður sér glitta í armbandið hugsar maður: „Já lífið er núna„ eða bara vita til þess er vonandi að lifa eftir því líka í dag.“

Melrós deilir sögu sinni í tilefni fjáröflunarátaks Krafts sem stendur nú yfir. Kraftur vekur athygli á málefninu í átakinu og selur Lífið er núna armbönd sem eru perluð af sjálfboðaliðum víða um land.

Fimmtudaginn 8. febrúar hvetur Kraftur landsmenn alla að halda upp á Lífið er núna-daginn og staldra við og njóta líðandi stundar með fólkinu í kringum sig.