Hversu oft stunda hamingjusöm pör kynlíf? Það er spurningin sem ný könnun á vegum streymisveitunnar ITVX reynir að svara. NY Post greinir frá.

Rannsakendur spurðu tvö þúsund bresk pör, sem eru í hamingjusömu langtímasambandi, hversu oft þau stunda kynlíf.

Samkvæmt niðurstöðum stunda pör, sem hafa verið saman í að minnsta kosti tíu ár, kynlíf sjö sinnum í mánuði að meðaltali.

Þetta voru ekki einu áhugaverðu niðurstöðurnar úr könnuninni. Fjöldi þátttakenda sögðu að kynlíf væri ekki stærsti áhrifaþátturinn í sambandi þeirra, heldur skipti mestu máli að „hafa gaman saman.“

Málamiðlun, hafa sama skopskynið og að halda ekki leyndarmálum frá hvort öðrum voru líka sagðir vera mikilvægir þættir í hamingjusömu sambandi.

20 prósent þátttakenda sögðust hafa haldið fram hjá maka sínum. Af þeim sögðu 58 prósent að það hafi komist upp um þá en þeim hafi tekist að bjarga sambandinu.