Elizabeth Holmes, stofnandi og eigandi Theranos, fæddi nýverið annað barn sitt og hefur óskað eftir að dómari sleppi henni við fangelsisvist meðan máli hennar er áfrýjað.
Holmes var dæmd til 11 ára fangelsisvistar fyrir svik eftir að hafa ranglega haldið því fram að tækni sem fyrirtæki hennar hannaði gæti keyrt læknispróf einstaklings með aðeins einum blóðdropa. Hundruðir slíkra prófa voru keyrð í gegnum fyrirtækið.
Sjá einnig: Ris og fall Elizabeth Holmes – Kennslubók í algjörri siðblindu
Lögmenn Holmes segja ekki hættu á að hún flýi land gangi hún laus á meðan dómnum er áfrýjað, en hún á að hefja afplánun 27. Apríl.
Sögu Holmes og Theranos var gerð skil í stuttþáttaröð HBO og Hulu, The Dropout, þar sem Amanda Seyfried lék Holmes.
„Fröken Holmes hefur djúp tengsl við samfélagið. Hún er móðir tveggja mjög ungra barnn, hún á í nánum tengslum við fjölskyldu og vini, sem margir hverjir skrifuðu bréf sem lögð voru fram við málaferlin og sögðu frá hversu góður borgari hún er og hún er í sjálfboðavinnu hjá stofnun sem sinnir ráðgjöf til þolenda nauðgana,“ segir í beiðni lögfræðinga Holmes.
Frumburðurinn fæddur fyrir réttarhöld
Óljóst er þó samkvæmt frétt CBS News hvenær Holmes átti barnið. Hún og barnsfaðir hennar, Billy Evans, eignuðust fyrsta barn þeirra, soninn William Holmes Evans, áður en réttarhöld yfir Holmes hófust 10. júlí 2021 í Redwood City, Kaliforníu.
Holmes kom fyrst fram á sjónarsviðið árið 2014 sem stofnandi og forstjóri Theranos, sem blekkti fjárfesta um stórar fjárhæðir með því að halda því ranglega fram að tæknin sem Theranos bjó yfir gæti keyrt hundruð læknisfræðilegra prófa með örfáum dropum af blóði.
Holmes var ákærð í 11 liðum fyrir svik samkvæmt kröfum sem lagðar voru fram af fjárfestum og sjúklingum. Kviðdómur fann Holmes seka um fjögur ákæruatriði.
Holmes var talin saklaus af fjórum ákæruliðum, en kviðdómur hefur ekki skilað niðurstöðu hvað varðar þrjá ákæruliði.
Blaðamaður afhjúpaði svikin
Svik Holmes voru afhjúpuð árið 2015, þegar John Carreyrou, blaðamaður Wall Street Journal, greindi frá því að vélin sem Holmes væri að selja, sem kölluð var The Edison, virkaði í raun ekki og að fyrirtækið notaði utanaðkomandi tækni til að falsa jákvæðar niðurstöður úr prófunum. Alríkisyfirvöld rannsökuðu Holmes í kjölfarið og ákærðu hana árið 2018.
Verjendur Holmes lögðu allt kapp á að sýna fram á að Holmes væri barnaleg og hefði ekki haft í hyggju að svíkja fjárfesta. Holmes bar vitni og sagði dómgreind sína hafi verið skerta á þessum tíma vegna meintrar kynferðislegrar og andlegrar misnotkunar sem hún varð fyrir í sambandi sínu við fyrrverandi framkvæmdastjóra Theranos, Ramesh Sunny Balwani, fyrrverandi kærasta hennar og meðákærða.
Balwani var sakfelldur fyrir 12 svik í júlí í fyrra. Saksóknarar hafa sagt að hann fái dóm eftir að Holmes verður dæmd.
Saksóknarar hafa hins vegar haldið því fram að Holmes hafi vitað nákvæmlega hvað hún var að gera.
