Í nýrri færslu á Facebook-síðu sinni spyr Listasafn Íslands hvort Bjúgnakrækir þurfi ekki að uppfæra sig í takt við tímann og neyta meira grænmetis. Safnið spyr einnig hvert nýtt nafn Bjúgnakrækis yrði ef hann gerðist grænmetisæta.

Í upphafi færslunnar segir að íslenskt samfélag hafi tekið breytingum og það þurfi jólasveinarnir að sætta sig við:

„Bjúgnakrækir hefur líkt og margir aðrir jólasveinar þurft að sætta sig við breyttar þjóðfélagsaðstæður. Bjúgnagerð fer minnkandi á heimilum, þar sem margir reyna eftir fremstu getu að minnka neyslu á unnum kjötvörum og einnig fer vaxandi hópur þeirra sem fylla ísskápinn einungis af grænmeti.“

Hvetur safnið Bjúgnakræki til að snúa sér frá bjúgunum og í átt að meira grænmeti:

„Því er spurning hvort Bjúgnakrækir þurfi ekki að uppfæra sig í takt við tímann og tileinka sér nýtt matarræði. Það gæti reynst honum erfitt eftir öll þessi ár en það er aldrei of seint að huga að heilsunni.“

„Kæri Bjúgnakrækir, meira salat og minni saltpétur um þessi jól.“

Að lokum spyr Listasafn Íslands þessarar stóru spurningar:

„Ef Bjúgnakrækir gerðist grænmetisæta, hvert yrði hans nýja nafn?“