Fjölmiðlakonan Lóa Pind Aldísardóttir og verkfræðingurinn Jónas Valdimarsson létu pússa sig saman í gær, laugardaginn 11. nóvember. Athöfnin fór fram í samkomuhúsinu Iðnó við Reykjavíkurtjörn.

Lóa greindi frá því í október árið 2017 í viðtali við tímaritið MAN að hún hefði kynnst Jónasi, sem búsettur var í Danmörku. Eins og svo mörg pör kynntust þau á Tinder.

„Mér fannst það alls ekki auðvelt, fannst það ekki við hæfi að ég væri þarna inni, 47 ára gömul sjónvarpskona,“ sagði Lóa í viðtalinu á sínum tíma. „Ég er gríðarlega skotin í þessum sæta ofvirka gaur þótt það flæki aðeins tilhugalífið að vera búsett hvort í sínu landinu. En endurfundirnir verða þá heitari fyrir vikið.“

Jónas flutti til Íslands og hefur starfað sem sjálfstæður leiðsögumaður í ferðum fyrir bæði Íslendinga og útlendinga. Jónas og Lóa hafa ferðast mikið saman og hún tekið upp sjónvarpsþætti fyrir Stöð 2, svo sem „Hvar er best að búa.“

DV óskar hjónunum innilega til hamingju með ráðahaginn.