Í tilkynningu frá RIFF, alþjóðlegri kvikmyndahátíð í Reykjavík, kemur fram að hótelkeðjan Iceland Hotel Collection by Berjaya verði einn af stærstu bakhjörlum hátíðarinnar í ár sem hefst 28. september og stendur til 8. október.
„Það er mikill heiður að taka þátt í áframhaldandi samstarfi með Berjaya sem hafa stutt vel við starfsemi okkar undanfarin ár,“ segir Hrönn Marinósdóttir, stjórnandi RIFF. „Það græða allir á menningartengdu samstarfi sem þessu,“ segir hún
Í tilkynningunni segir að samstarfið byggi á grunni samstarfs liðinna ára þar sem hótelin hafi áður stutt við starfsemi RIFF með myndarlegum hætti en hátíðin verði nú haldin í tuttugasta skiptið og því um sannkallaða stórafmælis útgáfu að ræða.
Byggir á samfélags ábyrgð
Samstarfið er sagt liður í stefnu Iceland Hotel Collection um samfélagslega ábyrgð þar sem stutt er við menningartengda viðburði sem beint og óbeint stuðla að kynningu á áfangastaðnum Íslandi og íslenskri menningu.
Í tilkynningunni segir enn fremur að markmið RIFF sé að kynna sjálfstæða kvikmyndagerð af öllum gerðum en RIFF sé ekki síður mikilvægur vettvangur fyrir íslenska kvikmyndagerðarmenn til að kynna verk sín fyrir umheiminum. Fjöldi erlendra blaðamanna og bransafólks sæki hátíðina ár hvert og áhugi þeirra á því að kynna sér íslenskar kvikmyndir leyni sér ekki.
Helstu samstarfsaðilar RIFF innan Iceland Hotel Collection eru Iceland Parliament hótelið við Austurvöll auk tveggja hótela innan Berjaya Iceland Hotels keðjunnar, Reykjavik Natura og Reykjavík Marina, auk Slippbarsins sem verður einnig sýningarstaður á kvikmyndahátíðinni.
Almennt um RIFF
Í tilkynngunni segir um RIFF:
„RIFF er nú haldin í tuttugasta skiptið og hefur hátíðin skipað sér á bás sem ein eftirsóttasta kvikmyndahátíð Norðurlanda. Meginhlutverk RIFF er að tryggja víðtækt úrval af hágæða, óháðri kvikmyndaframleiðslu með áherslu á unga kvikmyndagerðarmenn. Tilgangur hátíðarinnar er að vekja áhuga á kvikmyndamenningu, auka kvikmyndalæsi og auðga kvikmyndamenningu á Íslandi með áherslu á alþjóðlega strauma. RIFF er einnig ætlað að skapa farveg fyrir viðskipti, nýsköpun, listsköpun, myndun alþjóðlegs tengslanets og samræðu við samfélagið og samtímann. RIFF er óháð hátíð, rekin án hagnaðar.“
Til að fræðast meira um Alþjóðlegu kvikmyndahátíðina í Reykjavík og UngRIFF, er hægt að fara inn á heimasíðu hátíðarinnar: www.riff.is.
