Síðastliðið ár hefur söngkonan glímt við mikinn húsnæðisvanda og reglulega auglýst eftir leiguhúsnæði í Vesturbænum í Reykjavík, þar sem börnin hennar ganga í skóla.
Upphafið á erfiðleikunum má rekja til myglu sem fannst í fyrri leiguíbúð þeirra og orsakaði mikil veikindi hjá fjölskyldunni.
„Eftir árangurslausa íbúðarleit komum við aftur á hótel. Öll buguð af þreytu en hér er engin mygla eða sterkar ilmefnalyktir sem fara illa í okkur eftir mygluveikindin. Við erum með alla anga úti og ég er að skoða bæði leiguíbúðir [og að kaupa fasteign] og óska eftir að þessari þrautagöngu ljúki sem fyrst, svo við náum heilsu,“ sagði hún um vandann í janúar á þessu ári.
Þórunn Antonía deildi gleðitíðindum með fylgjendum hennar á Instagram fyrr í dag.
„Ég er komin með íbúð!! Flutti inn í nótt og allt er gaman,“ sagði hún og brosti út að eyrum.
Fyrr í vikunni óskaði söngkonan eftir atvinnutilboðum og lýsti fyrri störfum og reynslu.
Sjá einnig: Þórunn Antonía ætlar að fá sér vinnu – „Ég er sirka þúsund sinnum sterkari en ég lít út fyrir að vera“
