Von er á óvenjulegum gestum til Íslands í þessari viku en þá mun parið Randy Santel og Katina DeJarnett sækja landið heim. Það sem gerir parið óvenjulegt er atvinna þeirra en þau Randy og Katina eru atvinnumenn í áti og ferðast um heiminn í leit að mataráskorunum á veitingastöðum, til að mynda þar sem í boði er að klára eitthvað ákveðið magn af mat fyrir tilsettan tíma.

Slíkar áskoranir eru vinsælar erlendis, sérstaklega í Bandaríkjunum, og leita Randy og Katina – sem kallar sig Katina eats kilos,  þær uppi, taka myndband af herlegheitunum og birta á samfélagsmiðlum. Vinsældir efnisins eru slíkar að parið hefur fulla atvinnu af. Randy er með rúma 1,6 milljónir fylgjenda á youtube-síðu sinni en Katina tæplega 600 þúsund. Má því með sanni segja að Randy og Katina séu sannkallaðar „áthrifavaldar“.

Sem dæmi um vinsæl myndbönd Randys er þegar hann graðkar í sig tæplega 5 kg steik og stærsta morgunmat heims, samkvæmt heimsmetabók Guiness, á veitingastaðnum Hard Boiled Egg í Írlandi. Randy át þar reyndar tvöfaldan skammt.

Á heimasíðu sinni segist Randy hafa byrjað feril sinn sem atvinnuátvagl árið 2010 en tíu árum síðar heyrði hann í Katinu út af sameiginlegu verkefni en þá hafði hún aðeins verið í eitt ár í bransanum. Ástin kviknaði og nú ferðast parið vítt og breitt um Bandaríkin og jafnvel heimshornanna á milli að éta allt sem hönd á festir.

Parið kemur til landsins þann 5. júlí næstkomandi og hyggjast dveljast hérlendis í rúma viku eða til 13. júlí. Þau hafa nú óskað eftir aðstoð á samfélagsmiðlum um mataráskoranir á íslenskum veitingastöðum sem þau geta reynt sig á og að sjálfsögðu tekið átökin upp.

Verður að teljast mikil synd að árlegt kótilettukappát Hrafnistu er yfirleitt skipulagt að vetri til.