Ragnhildur Steinunn Jónsdóttir fjölmiðlamaður er gestur Einars Bárðarsonar í hlaðvarpinu Einmitt. Ragnhildur hefur kynnt eða verið viðloðin Söngvakeppnina meira og minna síðan árið 2007 og er jafnan með mörg járn í eldinum, enda þolir hún ekki leti. Ragnhildur og Einar ræða allt milli himins og jarðar í þættinum allt frá fimleikum að forræðisdeilum, feðraveldi og mæðrahyggju í þessu skemmtilega spjall en í kvöld frumsýnir Sjónvarpið nýja þátttaröð Tvíburar sem Ragnhildur framleiddi en hún og eiginmaður hennar eignuðust tvíbura árið 2019. 

Þurfti að þroskast hratt eftir móðurmissi

Ragnhildur segist alltaf hafa verið næm á umhverfi sitt og fljót að lesa í fólk og stemningu. „Ég missti mömmu mína mjög ung og þurfti að þroskast mjög hratt og vinna úr mínum tilfinningum og föður míns. Ég hef náð að nýta mér þetta og læra af mínum mistökum. “

„Þú ert svo lík stelpunni í Söngvakeppninni“

Á lokaári í sjúkraliðanámi fékk Ragnhildur fyrsta tækifærið til að vera kynnir í Söngvakeppninni. „Ég var í verknámi á Landspítalanum og þar voru sjúklingarnir alltaf að segja mér að ég væri svo lík þarna stelpunni í Söngvakeppninni. Við gætum verið systur. Ég púllaði þann leik þannig að það væri nú gaman og spurði hvernig hvernig hún væri að standa sig.“  

Unnu öll kvöld í mánuð 

Ragnhildur segir að lykillinn að því að bæta sig sem manneskja í sjónvarpi sé að horfa á það sem maður hefur gert. „Ég læri mest af því að klippa efnið sjálf. Ég hef verið að klippa viðtöl fyrir Söngvakeppnina fram á nótt. Þetta er ekki þannig að ég mæti bara í smink og svo í útsendingu. Ég held að fólk geri sér ekki grein fyrir hvað við erum í raun fá að vinna stórt verkefni. Við fimm sem erum í framkvæmdastjórninni erum mánuð fyrir keppni að vinna öll kvöld. Þetta er bara þannig. Maðurinn minn bara veit það.“  

„Geturðu ekki eignast tvíbura án þess að gera sjónvarpsþátt? “

Framundan er sýning þáttaraðar á RÚV sem Ragnhildur hefur unnið að undanfarin þrjú ár og nefnist Tvíburar. Sjálf eignaðist hún tvíbura fyrir fjórum árum. „Ég talaði við meira en 70 tvíbura til að fá sem víðustu innsýn inn í líf tvíburaforeldra, þar með talið heimilismyndbönd. Sýnt verður frá tvíburafæðingu í fyrsta sinn í íslensku sjónvarpi og við fylgjumst meðal annars með tvíburaforeldrapari sem mun heilla þjóðina upp úr skónum,“ segir Ragnhildur. 

Þáttinn í heild sinni má hlusta á hér.