Mikla athygli vakti í gær þegar María Sigrún Hilmarsdóttir, fréttaþulur RÚV, greindi frá því á Twitter að hún hefði lesið fréttir kvöldsins í 18 ára gömlum jakka úr H&M, sem hún þar að auki getur ekki hneppt að sér lengur.

Þykir þetta bera vitni um nýtni sem er lofsverð á tímum loftslagsbreytinga þegar hjarta almennings er farið að slá með sjálfbærni og minnkandi neyslu.

En það eru fleiri fjölmiðlakonur sem fara vel með fötin sín. Elín Hirst, blaðamaður á Fréttablaðinu og Hringbraut á líka föt sem láta lítið á sjá í gegnum tímans rás. Í fréttasetti Hringbrautar klæðist hún gjarnan jökkum sem eru 30 ára gamlir, á hún tvo slíka.

„Þannig var mál með vexti að Ingvi Hrafn Jónsson, þáverandi fréttastjóri á Stöð 2, sendi okkur Sigmund Erni, en við vorum aðalfréttaþulir hjá honum, í vandaða verslun þar sem ég keypti þessi tvo jakka. Annar er rauður og hinn köflóttur. Ég hef notað þá í 30 ár á skjánum og það sér ekki á þeim. Gaman að sjá vinkonu mína Maríu Sigrúnu Hilmarsdóttir fréttakonu á RÚV og Svövu Kristínu Grétarsdóttur, íþróttafréttamann á RÚV, klæðast gömlum fötum og jafnvel keyptum á nytjamarkaði. Vel gert. Nú skora ég á vinkonu mína hana Eddu Andrésar að sýna okkur hvað hún á í sínum fataskáp. Ef til vill getur hún toppað minn 30 ára jakka.“

Spurning er hvort Edda geti slegið Elínu við í þessum efnum. Elín hefur hér með skorað á hana.