Myndband af konu sem heldur á ljóni á götum Kúvaít hefur vakið mikla athygli undanfarna daga. Þarlend yfirvöld staðfesta að ljónið hafi strokið af heimili sínu en það er í eigu konunnar og föður hennar.
Mörgum þykir ótrúlegt að ljónið hvorki klóri hana né bíti en það mun stafa af því að ljónið er gæludýr fjölskyldunnar. Þó er ljóst að ljóninu þykja þessar aðfarir ekki þægilegar. Myndbandið er tekið á Sabahiya svæðinu í suðurhluta Kuvaítborgar. UPI greinir frá þessu.
Lögreglan hjálpaði til við að handsama ljónið en konan hélt síðan á því heim. Löglegt er í Kúvaít að halda ýmis framandi dýr sem gæludýr, þar á meðal ljón.
