„Það sést á andlitum þátttakenda að þetta var stórkostlegt hlaup!‟ segir Valdimar Gunnarsson, framkvæmdastjóri Ungmennasambands Kjalarnesþings (UMSK) og einn skipuleggja Hundahlaups UMFÍ og Non-stop dogwear sem fram fór í fyrsta sinn síðdegis í dag.
Rúmlega 90 skælbrosandi þátttakendur á öllum aldri hlupu með hundum sínum af öllum stærðum í rjómablíðunni á grasflötinni ofan við smábátahöfnina á Seltjarnarnesi. Ræst var út með einnar mínútu millibili og því gekk hlaupið afar hratt fyrir sig.
Í boði voru tvær hlaupaleiðir, 2 kílómetra og 5 kílómetra hlaup. Hlauparar í 5 kílómetra hlaupi voru ræstir fyrstir í nokkrum hollum en síðan hinir.
Hundahlaupið markar tímamót því þetta er fyrsta skiptið sem íþróttahreyfingin og hundaeigendur snúa bökum saman og standa að skemmtilegum viðburði. Hundahlaupið tókst afar vel og mál manna að það verði að endurtaka.
Hundahlaup UMFÍ og Non-stop dogwear er hluti af Íþróttaveislu UMFÍ og 100 ára afmælis UMSK.
Það var svo sannarlega líf og fjör í fyrsta hundablaupinu sem haldið hefur verið eins og neðangreind myndasyrpan sýnir:
