Hollywoodstjarnan og Íslandsvinurinn Ben Stiller nýtur nú lífsins í Flatey í Breiðafirði ásamt stórvini sínum og kollega, Ólafi Darra Ólafssyni. Stiller er mikill aðdáandi lands og þjóðar eftir að hafa tekið upp hluta af myndinni The Secret Life of Walter Mitty hérlendis árið 2013 en Ólafur Darri lék einmitt stórt hlutverk í myndinni og varð þeim vel til vina.

Eiríkur Jónsson greinir frá Íslandsheimsókn leikarans en þar kemur fram að þeir félagarnir hafi setið að snæðingi á Hótel Flatey og látið fara vel um sig.

Ekki liggur fyrir hvort að heimsóknin tengist einhverju verkefni eða hvort Stiller sé aðeins að hvíla lúin bein.

Í júní-mánuði var Stiller á fleygiferð um Austur-Evrópu  til að vekja athygli á málefnum úkraínskra flóttamanna og hvetja til stuðnings við þá og aðra flóttamenn um allan heim. Hann fór meðal annars ttil Kyiv, höfuðborgar Úkraínu, og hitti þar meðal annars Volodymyr Zelenskyy, forseta.

Stiller og Zelenskyy tókust í hendur og Stiller sagði forsetann vera hetjuna sína: „Þetta er mér mikill heiður. Þú ert hetjan mín. Þú áttir ansi góðan leiklistarferil áður.“

Þessu svaraði forsetinn dáði af hógværð og sagði: „Ekki eins glæstan og þú.“