Hinir geysivinsælu þættir „Euphoria“ hafa slegið í gegn og hlotið mikið lof gagnrýnenda. Önnur þáttaröð er nú í gangi á HBO og bíða aðdáendur óþreyjufullir eftir hverjum þætti.
Aukaleikkona sviptir hulunni af því hvernig það var í raun og veru á tökustað og segir upplifun sína vera „ömurlega“ og „skelfilega,“ og að fjöldi aukaleikara hefðu neitað að mæta aftur á tökustað eftir mjög erfiðan tökudag.
Leikkonan birti myndband á TikTok, sem hún hefur nú eytt, þar sem hún segir frá þessu. BuzzFeed greinir frá.
Í myndbandinu fór hún yfir hvernig það var að taka upp sjöunda þátt seríunnar, sem fjallaði mikið um leikrit Lexi, karakters í þáttunum. Í þættinum eru áhorfendur í sal þar sem aðalleikararnir sitja meðal aukaleikaranna og eru að bregðast við því sem fer fram á sviðinu.
Aukaleikkonan heldur því fram að það tók „nokkrar vikur“ að taka upp þáttinn, sem er 59 mínútur að lengd. Hún segir að ein af ástæðunum fyrir því hefði verið vegna þess að margir aukaleikarar neituðu að koma aftur á tökustað eftir langa tökudaga og það gerði það erfitt fyrir framleiðendur þáttanna að láta tímalínu þáttarins ganga upp.
„Leikritið og áhorfendasenurnar tóku svo langan tíma. Það tók margar vikur fyrir þau að taka bara upp þennan þátt, sem er satt að segja klikkað,“ segir aukaleikkonan.
„Þess vegna er mikið ósamræmi í bakgrunninum, því augljóslega vildi fólk ekki mæta aftur. Ég vildi það ekki því mér leið ömurlega.“
Hún benti síðan á hvar hún sat í áhorfendasalnum, nokkrum röðum á bak við Jacob Elordi og Sydney Sweeney, sem leika Nate og Cassie.
Aukaleikkonan benti á fleiri atriði sem eru ekki í samræmi við fyrri senur og svaraði spurningum netverja.
Aðspurð af hverju aukaleikarar hefðu ekki viljað koma aftur sagði hún: „Aðallega vegna veðurs og því þeim leiddist (16 klukkustunda vinnudagar).“
Hún sagði að aukaleikararnir hefðu fengið greitt fyrir alla tímana sem þeir voru á tökustað en fengu ekki að vita um lengd vinnudagsins fyrir fram.
Hún viðurkenndi að það hefði verið gaman að sjá stjörnur þáttarins leika, en sú spenna hefði dvínað hratt.
„Það var súrrealískt að sjá þau leika í alvörunni (ég er aðdáandi þáttanna) en eftir smá tíma þá var ég bara dofin og vildi fara heim. Flestir leikararnir voru vingjarnlegir,“ sagði hún og gaf þar með í skyn að sumir voru það ekki.
Hún sagði einnig að aukaleikararnir hefðu ekki mátt tala við aðalleikarana.
„Ef við hefðum talað við þau (sérstaklega sem aðdáendur) þá hefðum við getað verið rekin,“ sagði hún.
Þetta var ekki í fyrsta skipti sem aukaleikkonan vann við tökur á „Euphoria“. Hún rifjaði upp þegar hún lék í fyrsta þættinum og sagði að það hefði verið „fokking skelfileg upplifun.“
„Það var svo kalt og mikið ryk, þau tóku símana okkar, til að koma í veg fyrir að við myndum spilla söguþræðinum, og við fengum ekkert almennilegt að borða (maturinn kom mjög seint og var kaldur),“ sagði hún.
Næsti þáttur kemur út á sunnudaginn á HBO.
