Líkamsræktarstöð í Kansas í Bandaríkjunum er að slá í gegn meðal kvenna á netinu. Heather Huesman, 23 ára, deildi myndbandi á TikTok þar sem hún sýnir frá stöðinni.
Þessi tiltekna líkamsræktarstöð, Blush, er aðeins fyrir konur. Það er ekki nýtt að stöð sé aðeins fyrir konur en það sem gerir hana sérstaka eru auka öryggisráðstafanirnar sem stöðin gerir til að vernda konurnar og gera upplifunina sem þægilegasta fyrir þær.
Stöðin er opin allan sólarhringinn. Útidyrnar eru læstar og fá meðlimir kort sem þeir nota til að komast inn. Það er filma í gluggunum svo gangandi vegfarendur sjá ekki inn. Það eru fríar tíðarvörur inni á baðherbergi. Svo er látið vita hvenær það eru karlkyns starfsmenn í húsinu.
@heatherhuesmanThe BEST GYM! We need these everywhere, we feel so safe and comfortable going to the gym, gonna be my new favorite spot!🦋💕 ##fyp ##TikTokGGT ##blush♬ SUNNY DAY – Matteo Rossanese
Myndbandið hefur fengið tæplega sex milljónir í áhorf og virðist fólk hafa nóg um stöðina að segja. Sumir karlmenn eru æfir yfir kvennastöðinni og ganga svo langt að kalla þetta „aðskilnað.“
Heather ræddi við BuzzFeed um stöðina og athyglina sem myndbandið hefur fengið. „Ég ákvað að deila upplifun minni því ég fann fyrir létti fyrsta skipti sem ég fór inn í Blush. Mér fannst ég geta andað léttar að ganga inn í líkamsræktarstöð með engum karlmönnum,“ segir hún.
„Mér finnst ég klárlega öruggari á kvennastöð. Ég vil vera í þröngum ræktarfötum því það er þægilegra að æfa í þeim og ég þarf ekki að hafa áhyggjur af því að karlmenn séu að taka myndir af mér án leyfis eða hafa áhyggjur af því að karlmenn láta mér líða óþægilega […] Stöðin er mjög snyrtileg og frábær orka þar.“
Miðað við ummælin við myndband Heather líður mörgum konum eins.
