Hertogahjónin Meghan Markle og Harry prins hafa gefið út yfirlýsingu vegna andláts Filippusar prins, eiginmanns Elísabetar II drottningar og afa Harrys.

„Í ástkærri minningu um hans konunglegu hátign hertogann af Edinborg, 1921-2021. Þakka þér þjónustuna… þín verður sárt saknað.“

Hertogahjónin eru sem stendur stödd í Kaliforníu og óvíst er hvort að þau muni bæði fljúga til Englands vegna andlátsins. Meghan gengur með annað barn þeirra hjóna og ferðatakmarkanir eru í gildi vegna heimsfaraldurs.

Filippus var lagður inn á sjúkrahús í febrúar, en fékk að fara heim í mars eftir hjartaaðgerð. Gayle King, besta vinkona spjallþáttadrottningarinnar Opruh, sagði að fræga viðtalið sem Oprah tók við hertogahjónin hafi verið tekið upp áður en Filippus lagðist inn á sjúkrahús og sýningu þess hefði verið frestað ef Filippus hefði fallið frá áður en þátturinn var sýndur.

„Bara svo þið vitið það þá var viðtalið tekið áður en Filippus prins lagðist inn á sjúkrahús,“ sagði King í mars. „Ef eitthvað hefði komið fyrir hann hefði viðtalið ekki verið sýnt á þessum tíma. En viðtalið var tilbúið og var sett á dagskrá áður en hann fór á sjúkrahúsið. Margir hafa vakið máls á þessu.“

Þrátt fyrir að ýmislegt sem í umræddu viðtali kom fram hafi ollið fjaðrafoki töluðu hjónin lítið um samband þeirra við Filippus. Harry talaði þó fallega um drottninguna, ömmu sína. „Ég hef rætt meira við ömmu þetta síðasta ár en ég hef gert í mörg ár þar á undan. Við eigum mjög gott samband okkar á milli og skiljum hvort annað. Ég virði hana mikið,“ sagði Harry.