Undanfarin ár hafa samsæriskenningar er varða form jarðarinnar færst verulega í aukanna, en hópur fólks sem trúir því að hún sé í raun og veru flöt virðist fara sístækkandi. Hópurinn heldur því jafnan fram að hringlaga form jarðarinnar sem flestir þekkja sé blekking sem stjórnvöld setja fram.
Samsæriskenningar sem þessar hafa ekki gert mikið vart við sig á Íslandi, þangað til um helgina þegar ónafngreindur karlmaður steig fram í útvarpsþættinum Listformið, sem er dagskrá á Rásar 1, og viðurkenndi að hann tryði því að jörðin væri flöt.
Maðurinn segist fyrst hafa farið að pæla í þessu árið 2014, þá 17-18 ára. Hann ætlaði sér að afsanna samsæriskenningamyndband þar sem þessu var haldið fram, en hreinlega gat það ekki. Hann segist trúa á samsærið þar sem hann hafi séð sönnunargögn í náttúrunni sem bendi til þess.
Hann viðurkennir þó að hann viti ekki hvers vegna almenningur sé blekktur til að trúa á hringlaga jörð, en segist viss um að einhver blekking sé í gangi.
„Þetta hefur þau áhrif að við hvern sem maður talar við, þá er maður samstundis afskrifaður sem hálfviti. Það eru félagslegu áhrifin af þessu. Þess vegna hef ég ekki áhuga á því að koma fram undir nafni, því ég nenni ekki að standa í einhverju þannig.“
Hann segist hafa sannfært tvo vini sína um að jörðin sé flöt og ruglað í kollinum á mörgum. Hann viðurkennir þó að konan hans hafi beðið hann um að hægja á sér í trúboðastarfinu, svo hann verði ekki „þessi skrýtni pabbi“
„Konan mín hefur beðið mig um að vera ekki þessi skrýtni pabbi. Þegar ég var að uppgötva þetta fyrst vildi ég hrista alla og vekja alla til lífsins. En núna er ég búinn að samþykkja það að fólk verður að átta sig á þessu á sínum hraða. Það er ekkert sem ég get gert til þess að gera það.“
Maðurinn heldur því fram að nú sé talsvert erfiðara að uppgötva flatleika jarðarinnar en áður. Ástæðan sem hann nefnir fyrir því er stríð tæknirisa og samfélagsmiðla á hendur þessum kenningum. Hann telur að almenningur sé bara þrælar og þeir sem stjórni blekki fólk til að halda völdum.a
„Það er eitt af því sem að telur mér enn meiri trú um að það sé eitthvað til í þessu, þegar maður sér fólkið sem að stjórnar, þessir tæknirisar og samfélagsmiðlar. Við sjáum hvað þeir eru mikið að fela þessar upplýsingar. Við erum bara þrælar og við lifum á mjög dimmum tímum. Það er partur af þessu. Þú vilt ekki að þrællinn þinn sé upplýstur, þú vilt halda þrælnum þínum eins heimskum og hann mögulega getur verið. Þess vegna er sniðugt að ljúga að honum um allt og sérstaklega einhverju svona grundvallaratriði eins og hvar hann býr og telja honum trú um að hann búi á einhverri kúlu, þar sem ef hann reynir að fara í burtu þá kemur hann bara aftur á sama stað. Þannig er okkur haldið í þessu fangelsi og sagt að það sé engin útgönguleið.“
