Áttu stundum erfitt með svefn því makinn er að hrjóta svo mikið? Ertu að verða alveg bandvitlaus á því? Hér eru nokkur ráð frá svefnfræðingnum og sálfræðingnum Suzy Reading sem birtust fyrst á Daily Star.
Suzy segir að það séu margir lífstílsþættir sem hafa áhrif á hrotur, meðal annars að vera í yfirþyngd, að reykja, vökvatap og að drekka áfengi.
Hún segir að með því að innleiða heilbrigða hreyfingu og næringu í daglegt líf þitt, auk þess að drekka nóg vatn, þá minnkar það líkurnar á hrotum. Það mun einnig bæta svefngæði og vellíðan í heild sinni að hennar sögn.
Það gæti komið þér á óvart en ryk og frjókorn geta aukið líkurnar á því að þú hrýtur, sérstaklega ef þú ert með ofnæmi.
Til að koma í veg fyrir þetta þarftu að ryksuga dýnuna þína reglulega samkvæmt Suzy. Hún mælir einnig með því að fara í sturtu og fara í hrein náttföt fyrir svefninn.
Þú hrýtur meira þegar þú sefur á bakinu, þannig með því að einfaldlega snúa þér á hliðina þá getur það dregið verulega úr hrotum.
Suzy mælir með að fá þér kodda sem er sérstaklega gerður fyrir fólk sem sefur á hliðinni. Hún ráðleggur einnig að setja kodda upp við bakið til að koma í veg fyrir að þú rúllir yfir á bakið í svefni.
Eins mikið og okkur langar að öskra á makann þegar hann hrýtur þá segir Suzy að það sé mikilvægt að muna að hann sé ekki að gera það viljandi.
Góð byrjun er að nota eyrnatappa. Ef það virkar ekki þá getur verið sniðugt að sofa í sitthvoru herberginu í nokkrar nætur til að tryggja að þú fáir nægan svefn.
Annað ráð er að einblína á eitthvað róandi. Suzy mælir með að gera öndunaræfingar, anda inn í fimm sekúndur og út í fimm sekúndur. Hún segir að þetta geti verið „mjög sefandi fyrir taugakerfið“ og með því að telja þá dregurðu athyglina frá hrotum makans.
