Söngkonan Demi Lovato vildi „gefast upp“ og byrja að nota fíkniefni aftur eftir að tímarit kallaði hana feita.
Demi var flutt á sjúkrahús í júlí árið 2018 eftir ofskömmtun á oxycódón og fentanýl. Hún var endurlífguð á sjúkrahúsinu og fór í kjölfarið í meðferð. Demi hefur ávallt verið opin um baráttu sína við fíkn og einnig átröskun, sjálfsskaða og geðhvarfasýki.
Demi var á dögunum í einlægu viðtali við tímaritið Paper og segir að það hafi verið mjög erfitt að lesa neikvæðar greinar um sig. Hún hætti því fyrir þremur árum, þegar hún var að taka fyrstu skrefin í átt að bata.
„Ég hafði nýlokið meðferð árið 2018 þegar ég las grein um að ég væri offitusjúklingur,“ segir Demi við Paper.
„Það er það versta sem þú gætir mögulega skrifað um einhvern sem glímir við átröskun. Þetta sökkaði og mig langaði að hætta. Mig langaði að nota fíkniefni, mig langaði að gefast upp.“
Demi segir að hún hafi áttað sig á því að ef hún les ekki þessar greinar þá geta þær ekki haft áhrif á hana. „Ég reyni að forðast það neikvæða,“ segir hún.
Sjá einnig: Segir misheppnuðu trúlofunina vísbendingu um kynhneigð hennar