Það eru komin sjö ár síðan Cameron Diaz lék í einhverju. Nú vitum við loks af hverju leikkonan er að taka sér svona langt hlé frá leiklistinni.
Í samtali við Bruce Bozzi á útvarpsstöðinni SirusXM opnar Cameron sig um ástæðuna fyrir því að hún er hætt að leika, allavega í bili.
„Ég ætla aldrei að segja aldrei,“ sagði Cameron um hvort hún ætlaði sér að snúa aftur í sviðsljósið.
„Mun ég einhvern tíman leika aftur í mynd? Ég er ekki að leitast eftir því, en mun ég? Ég veit það ekki. Ég hef ekki hugmynd.“
Cameron sagði hvað hafi spilað stórt hlutverk í ákvörðun hennar. „Ég gæti ekki ímyndað mér, verandi móðir núna með barn á fyrsta ári, að vera á tökustað í fjórtán til sextán klukkutíma á dag, í burtu frá barninu mínu. Ég gæti bara ekki ímyndað mér það,“ sagði hún og bætti við.
„Ég væri ekki móðirin sem ég er í dag ef ég hefði ákveðið að gera það á einhverjum öðrum tímapunkti í lífi mínu.“
Cameron eignaðist sitt fyrsta barn með eiginmanni sínum Benji Madden fyrir rúmlega ári síðan. Stúlkan fékk nafnið Raddix Madden. Hjónin tóku snemma ákvörðun um að halda dóttur sinni úr sviðsljósinu og hafa til að mynda aldrei deilt mynd af henni.