Tónlistargagnrýnandinn Jónas Sen fer hörðum orðum um uppfærslu Óperudaga á Fidelio, en það er eina óperan sem Ludwig van Beethoven samdi. Sýningin er í Hörpu.

Jónas birti dóm í Fréttablaðinu í dag þar sem hann gefur uppfærslunni tvær og hálfa stjörnu af fimm mögulegum. Jónas segir söngvara sýningarinnar raunar standa sig vel en hljóðfæraleikurinn sér rýr sem dragi sönginn niður:

„Rýr hljóðfæraleikurinn gerði að verkum að söngurinn náði sjaldnast flugi, enda er hljómsveitarröddin órjúfanlegur hluti af söngnum. Saman mynda þau eina heild og
hér varð hún aldrei mjög bitastæð.“

Þessi uppfærsla Óperudaga ber undirtitilinn „Atlaga að óperu“ og er verkið sýnt í styttri útsetningu og fyrir sjö manna hljómsveit í stað sinfóníuhljómsveitar eins og gert er ráð fyrir í upprunalegri útgáfu verksins. Þessi einfaldari útfærsla á þessari óperuklassík virkaði greinlega illa á gagnrýnandann sem segir uppfærsluna vera ósannfærandi og hlaðna vanköntum. Jónas segir að Fielio sé grafvalvarlegt verk um helgi hjónabandsins og sé hlaðið fegurð sem hér hafi verið víðsfjarri:

„Atriði í henni eru með því fegursta í gervöllum tónbókmenntunum. Þessi fegurð var víðsfjarri hér. Hið fallega var fáránlegt, hið fína ófágað, hið flotta fátæklegt. Í staðinn var boðið upp á skrumskælingu á dýrmætri perlu Beethovens, og mér var satt best að segja ekki skemmt.“

Gunnar Guðjörnsson óperusöngvari, sem tekur ekki þátt í þessari sýningu, er afar ósáttur við þessi skrif Jónasar og beinir þeirri ósk til Fréttablaðsins að losa tónlistarfólk við skrif þessa gagnrýnanda. Gunnar skrifar í Facebook-færslu:

„Það eru örlög okkar tónlistarfólks að lifa við það að þessi gagnrýnandi, sem aldrei hefur átt erindi í starfið, skrifi íslenska óperusögu.

Uppfærslan á Fidelio var í alla staði afrek, alveg sama hvar til hennar var litið. Gagnrýnandi sem sér það ekki, ætti að sitja heima eða hafa vit til að sleppa því að skrifa ef hann getur ekki vandað betur til verka. Yfirleitt les ég ekki þvæluna og ætla sannarlega að sleppa því í dag.

Það væri góðverk að nýráðinn ritstjóri Fréttablaðnsins sæi til þess að losa tónlistarlífið (amk óperulistformið á Íslandi) við þetta í eitt skipti fyrir öll. Við eigum einfaldlega of mikið af frábæru fagfólki tli að okkur sé boðið upp á þetta.“