Egill Einarsson, sem einnig er þekktur sem Gillz, er þessa stundina staddur í bænum Locarno í Sviss. Þar fer fram kvikmyndahátíðin Locarno International Film Festival en íslenska kvikmyndin Leynilögga verður frumsýnd þar. Egill er einn af leikurum myndarinnar.
Sverrir Sverrisson, eða Sveppi eins og hann er gjarnan kallaður, er einnig að leika í myndinni og er því líka í Sviss. Þeir félagar skemmtu sér saman í gær, fóru meðal annars á bát saman og út að borða.
Egill tók upp myndband á veitingastaðnum sem hefur farið öfugt ofan í marga. Í myndbandinu spyr Egill þjóninn hvort það sé í lagi að Sveppi sitji með þeim á staðnum. „Er í lagi að þessi feiti sé hérna? Er það í lagi?“ spyr Egill á ensku og þjónninn hlær og svarar játandi. „Viltu láta hann fara eða er þetta í lagi?“ spyr Egill svo og þjónninn segir að það sé í lagi.
Edda Falak, þjálfari, áhrifavaldur og hlaðvarpsstjórnandi, gagnrýnir Egil harkalega fyrir myndbandið og segir að í því sé hann að gerast sekur um fitufordóma. „Settu einhvern annan jaðarhóp inn í þetta grín, „is it okei that the black one is here“ það yrði allt brjálað. En af því að hann er að tala um feita að þá fær þetta að slide-a???“ segir Edda í færslu sem hún birti á Twitter-síðu sinni.
Settu einhvern annan jaðarhóp inn í þetta grín, “is it okei that the black one is here” það yrði allt brjálað. En af því að hann er að tala um feita að þá fær þetta að slide-a??? pic.twitter.com/IuVXXW4srd
— Edda Falak (@eddafalak) August 8, 2021
Fjölmargir taka undir með Eddu í athugasemdunum við færslu hennar. „Að opinbera fitufordoma sína í skjóli „gríns“ er svo fokking úrelt. Do better. Ekki í lagi,“ segir til að mynda aktívistinn Tanja Ísfjörð. „En ég meina… þetta er gillz erum við hissa?“ segir svo netverji nokkur.
„Þessi vinahopur sem þessir tveir tilheyra virðist hafa staðnað í þroska í kringum árið 2000…sem er alveg pínu slæmt afþví allt of margir unglingar, aðallega strákar líta upp til þeirra!“ segir svo annar netverji.
Líkt og myndbandið fór öfugt í marga þá fór gagnrýnin á það líka öfugt í marga, þó ekki sömu aðilanna. Margir hneykslast á Eddu fyrir að gagnrýna Egil. „Hann er aðeins að gera grín í vini sínum. Hvað í andskotanum er að því ef Sveppa er sama?“ segir til að mynda maður nokkur. „Hahahah djöfull vælirðu,“ segir annar.
„Jeez luisez … kunniði ekki að lesa í aðstæður … vinir eru og verða vinir. Það eru ekki allir með fordóma þótt þið sjáið fordóma í öllu,“ segir svo enn annar.
