Breska fyrirsætan Kerry Katona segist hafa grætt yfir milljón punda, eða um 169 milljónir í íslenskum krónum, með því að selja kynferðislegar myndir og þá sérstaklega myndir af fótunum sínum, svokallaðar tásumyndir.
Kerry hefur þó ekki alltaf verið í jafn góðum málum þegar kemur að peningum. Árið 2008 varð fyrirsætan gjaldþrota en á síðustu árum hefur hún náð að snúa vörn í sókn. Kerry, sem er í dag 40 ára gömul, er orðin milljónamæringur á ný en peningarnir streymdu inn eftir að hún opnaði aðgang á OnlyFans, þeirri vinsælu en um leið umdeildu vefsíðu.
„Fólk er ekki lengi að segja „hún er örvæntingarfull“ ef ég sýni smá af geirvörtunum mínum en ég er búin að græða mína fyrstu milljón síðan ég varð gjaldþrota svo ég er virkilega stolt,“ segir Kerry í samtali við Mirror um málið. „Ef það væri ekki fyrir OnlyFans þá ætti ég ekki pening til að fjárfesta í sjálfri mér og fyrirtækjum.“
Kerry er dugleg að birta nærfatamyndir af sér á OnlyFans en fylgjendur hennar borga henni meira til að sjá djarfari myndir, fótamyndir eru auk þess mjög vinsælar. „Ég sendi mest af kynferðislegum skilaboðum og myndum en ekkert meira en bara af mér á brjóstunum. Ég hef fengið fullt af beiðnum um tásumyndir frá fólki sem finnst svoleiðis vera spennandi,“ segir Kerry en ástæðan fyrir vinsældum tásumyndanna er eflaust stærðin á fótum fyrirsætunnar en hún notar skó í stærðinni 35 og hálft.
