Sesselja Anna Ólafsdóttir missti son sinn árið 2019. Hann tók sitt eigið líf á geðdeild í Leipzig í Þýskalandi, aðeins 31 árs gamall. Vegna mannlegra mistaka frétti fjölskyldan ekki af andlátinu fyrr en viku seinna. Mannlíf ræddi við Sesselju.

Helgi Már, sonur Sesselju, útskrifaðist sem stúdent frá Fjölbrautaskólanum í Breiðholti. Hann hafði áhuga á að fara í framhaldsnám erlendis og fór að safna sér pening. Þá fékk hann botlangabólgukast og þurfti að fara í aðgerð. Þetta kast átti eftir að valda honum magaverkjum alla hans ævi. Hann fluttist til Belgíu og starfaði á hestabúgarði í nokkra mánuði. Þar var farið illa með hann og vill Sesselja meina að um vinnuþrælkun hafi verið að ræða.

Helgi flutti til Leipzig árið 2012 þar sem hann stefndi á listnám. Hann komst þó ekki inn í skólann sem hann ætlaði sér í fyrr en árið 2016. Sesselja segir son sinn hafa verið ótrúlega ánægðan og að hann hafi haldið myndlistarsýningar og spilað á gítar með hljómsveitum um allan bæ.

Sesselja sendi Helga pening á meðan hann var úti þar sem hann fékk ekki námslán. Hann þjáðist enn af verkjunum og átti erfitt með að sofa vegna þeirra. Í október 2018 lagðist hann að lokum inn á geðdeild í Leipzig vegna andlegrar líðan sem rekja má til svefnleysis.

Sesselja og eldri dóttir hennar ákváðu að heimsækja Helga á sjúkrahúsið í Leipzig í mars 2019. Helgi hafði ekki svarað símtölum í nokkra daga áður en þær komu út. Síðasta símtalið var 28. febrúar.

Þegar Sesselja var komin á sjúkrahúsið þann 7. mars fóru þær að spyrjast til um Helga en fengu fá svör þar sem enginn talaði almennilega ensku. Þegar þær höfðu beðið í tvo tíma var þeim tilkynnt að Helgi væri látinn. Hann hafði tekið sitt eigið líf viku áður.

Sjúkrahúsið tilkynnti andlátið til íslenskra yfirvalda fljótlega en lögreglumaður á Íslandi sem tók við tölvupóstinum gleymdi að láta þau vita. Lögreglan hafði ekki samband við fjölskylduna fyrr en Sesselja og systir Helga voru mættar á sjúkrahúsið.

Viðtalið við Sesselju má lesa í heild sinni hér.