Goslokahátíðin í Vestmannaeyjum fer fram næstu helgi. Dagskrá hátíðarinnar kom út í dag eftir erfiða skipulagningu sökum Covid-19. Skipulagning hátíðarinnar hófst í byrjun árs. Hápunkturinn undanfarin ár hefur verið útiskemmtun á laugardagskvöldinu. Eftir að Covid-19 kom upp var ákveðið að sleppa þeirri skemmtun og leggja áherslu á aðra viðburði. Ákveðið var að halda fjölskyldutónleika á laugardagskvöldinu sem hefur nú verið aflýst.

„Forsendur breyttust um helgina þegar innanlandssmitin komu upp,“ segir Sigurhanna Friðþórsdóttir einn af skipuleggjendum hátíðarinnar. „Yfirvöld hertu kröfurnar og við sáum okkur ekki fært að halda tónleika þar sem búist var við fjölda fólks. Við vorum búin að gera ráð fyrir að skipta svæðinu upp. Svo núna eftir helgi var komin upp sú staða að við hefðum þurft að hafa gæslu í hverju einasta hólfi og fólk hefði ekki mátt fara út úr sínu hólfi. Þetta hefði getað skapað meiri leiðindi heldur en gleði,“ segir Sigurhanna.

Aðrir viðburðir haldast óbreyttir. „Við höldum okkur við barnadagskrána og smærri listviðburði.“ Fleiri tónleikar eru á dagskrá komandi helgi. Þeir munu þeir allir fara fram enda uppfylla þeir öll skilyrði tengd sóttvörnum og fjöldatakmörkunum að sögn Sigurhönnu.

„Við tókum þessa ákvörðun með hag bæjarbúa í huga. Viðbrögðin hafa ekki verið neitt annað en góð, við fáum mikinn skilning frá öllum,“ segir Sigurhanna.

„Goslokanefnd óskar gestum sínum og landsmönnum öllum góðrar skemmtunar um helgina og minnir á mikilvægi sóttvarna og ábyrgrar hegðunar í hvívetna,“ segir Sigurhanna.

Fréttin hefur verið uppfærð