Guðmundur Franklín Jónsson, forsetaframbjóðandi, birti mynd í gærkvöldi sem sýndi sterka afstöðu hans gagnvart einu umdeildasta máli sitjandi forseta, Guðna Th. Jóhannesson. Stóra ananas á pizzu-málinu.
Árið 2017 vakti gríðarlega athygli þegar að Guðni sagðist vera alfarið á móti ananas á pizzu. Hann gekk meira segja svo langt að halda því fram að hann myndi banna áleggið á pizzu skyldi hann hafa völdin til þess. Þessi skoðun hans kom fram í heimsókn í Menntaskólanum á Akureyri, en ljóst er að þau voru í léttari kantinum. Vísir fjallaði mikið um málið á sínum tíma.
Í gærkvöldi birti Guðmundur mynd af sér ásamt ananas-pizzu sem hann virtist ætla að fara að snæða. Myndina birti hann ásamt textanum: „Ahh pizza með ananas….mmmm.“
Þarna hefur forsetaframbjóðandinn að öllum líkindum verið að gera grín að áðurnefndum ummælum Guðna sem vöktu líkt og áður segir mikla athygli.
Hvað segja lesendur, á ananas heima á pizzu?
