Donald Trump, forseti Bandaríkjanna, hefur vakið athygli fyrir margt annað en störf sín sem forseti síðustu ár. Hann hefur oft komist í fréttirnar fyrir útlit sitt, þar sem hárgreiðslan, fatastíllinn og dálæti hans á brúnkukremi hefur gjarnan stolið senunni.
Brúnkuslys er eitthvað sem maður hefur ekki tengt beint við forseta Bandaríkjanna. Donald Trump breytti því rækilega og hefur tekist að klúðra notkun á brúnkukremi – ítrekað. Hann myndi líklega kalla það falsfréttir en við leyfum okkur að benda á að hann ætti að þiggja aðstoð förðunarfræðings næst þegar hann hyggst fríska upp á útlitið.
Eitt af einkennum Trumps eru bindin hans. Hann er iðulega með rautt bindi en skiptir því stundum út fyrir blátt. Það sem vekur gjarnan athygli við bindin er hvað þau eru síð. Þumalputtaregla við notkun á hálsbindi er að það á ekki að ná niður fyrir buxnastreng. Það hefur gleymst að láta forsetann vita.
Trump í einhverju öðru en jakkafötum er sjaldséð sjón. Hann stundar einstaka sinnum golf og skellir sér þá í golffötin. Hann virðist halda sig við frekar stórar stærðir, sama hverju hann klæðist.
Stór jakkaföt forsetans hafa ítrekað fangað athyglina og er hann jafnvel talinn hafa haft áhrif á tískustrauma með þessu sérlega dálæti sínu á of stórum jakkafötum. Slík föt rötuðu ítrekað á tískupalla eftir að Donald Trump fór að ganga í þeim. Ein þeirra sem hafa skartað slíkum klæðnaði er Kim Kardashian en hún er stórvinkona forsetans umdeilda. Á meðfylgjandi mynd má sjá að skálmarnar á buxum forsetans eru víðari en gengur og gerist á jakkafatabuxum.
Trump hefur skartað ótalmörgum hárgreiðslum í gegnum tíðina. Þunnt hárið hefur ýmist verið greitt aftur á bak eða verið gult. Myndir segja meira en þúsund orð.