Móðir hefur verið harðlega gagnrýnd fyrir að hrekkja þriggja ára gamla dóttur sína. Hún sagði henni að teiknimyndakarakterinn Peppa Pig væri fyrir utan heimili þeirra. Stúlkan er mikill aðdáandi gríslingsins og var mjög spennt að heyra fregnirnar. Hins vegar runnu fljótt á hana tvær grímur þegar hún sá hvað var í raun og veru fyrir utan heimili þeirra.
Chelsea-Lee Blackburn deildi myndum af hrekknum á Facebook. Dóttir hennar, Dollie-Leigh Dickson, elskar fátt jafn mikið og Peppu Pig og var ósátt við móður sína þegar hún sá svínshræ hangandi fyrir utan gluggann heima hjá þeim.
Í samtali við The Sun segir Chelsea að hún hefur platað Dollie áður, en þetta sé í fyrsta skipti sem hún nær viðbrögðum hennar á filmu. Myndirnar hafa vakið mikla athygli og farið eins og eldur í sinu um netheima.
„Þú sérð vonbrigðin framan í henni, hún bara horfði á mig alveg: Mamma þetta er ekki Peppa Pig. Svipurinn á henni var svo fyndinn, hún var svo reið út í mig,“ segir Chelsea.
„Hinum megin við götuna er slátrari og hann fær til sín svín í hverri viku. Dollie venjulega kíkir á þau og elskar að skoða þau. Fyrst þegar við fluttum hingað þá var ég ekki mjög hrifin af þessu, en með tímanum höfum við vanist þessu og þetta truflar ekki Dollie, bara ekki neitt.“
Mörgum þykir hrekkurinn fyndinn en fjöldi fólks hefur gagnrýnt móðurina fyrir að vera „illkvittin“ og segja hrekkinn vera „ógeðslegan“.
„Ég veit að sumir hafa ekki húmor fyrir þessu, ég bjóst ekki við að þetta myndi vekja svona mikla athygli,“ segir Chelsea.