„Það er hryllingur að greinast svona ung, að eiga allt lífið fram undan og allt í einu að eiga það ekki fram undan. Það er bara hryllingur þegar ég á ung börn og stjúpbörn,“ segir Alma Geirdal, ljósmyndari og uppistandari, í einlægu viðtali í nýjasta tölublaði Mannlífs.
Margir landsmenn kannast við Ölmu og baráttu hennar við krabbamein. Hún var 38 ára þegar hún greindist með brjóstakrabbamein, en eftir að hafa gengist undir meðferð var hún laus við meinið um tíma. Hún greindist svo aftur og að þessu sinni er engin lækning.
Alma á þrjú börn; tvítuga dóttur og stráka sem eru 16 og 11 ára. Þá á hún tvö stjúpbörn, 15 ára dóttur og 10 ára son, sem unnusti hennar, Guðmundur Sigvarðsson á. Þau vita af veikindum Ölmu og segir hún að þau séu einstaklega sterk.
„Þau eru bara úr stáli, þetta eru sterkustu einstaklingar sem ég þekki og þau fara í gegnum þetta á einhverju sem ég veit ekki hvað er. Þau eru mömmu sinni mikið innan handar og dæla í mig jákvæðum styrk,“ segir hún.
Hún segir það hafa verið mikið áfall að greinast aftur með krabbamein. Hún hafi verið vongóð eftir að hafa losnað við krabbameinið í fyrra skiptið en það hafi verið eins og svört þoka legðist yfir þegar það greindist aftur. „Og tíminn bara stöðvast þegar þú færð svona fréttir.“
Alma segir að læknar hafi gefið henni fjögur ár og það sé ekkert leyndarmál. „Ég vil ekki að það sé feimni við dauðann í þessu viðtali, bara alls ekki, ég fer sátt. Ég er komin með tímann, fjögur ár, aðeins skemur eða aðeins lengur, og það má segja frá því,“ segir hún.
Hún segist ekki einblína á neina dagsetningu en sé meðvituð um stöðuna. „Ég hef tileinkað mér að lifa í núinu og lifa eftir núvitund og tel mig gera það vel,“ segir hún.
