Flosi V, ungur kvótaerfingi og rappari, gaf í dag út nýtt tónlistarmyndband við lagið Hvað veist þú um það. Það vakti athygli fyrr á þessu ári þegar Stundin fjallaði um efnishyggjuna í íslenskri tónlist í dag en myndir af Flosa voru áberandi í greininni.

Í grein Stundarinnar var fjallað um texta Flosa með hliðsjón af gróða fjölskyldunnar hans. „Þeir tala um þúsundkall, ég tala um milljónir, segir ungur kvótaerfingi á Instagram og birtir mynd af sér að veifa þykku búnti af fimm þúsund króna seðlum í lúxusbíl. Útgerðarfélag fjölskyldunnar hans hagnaðist um tvo milljarða króna á síðasta uppgefna rekstrarári. En sjálfur er hann að hefja rappferil.“

Eins og áður segir þá gaf þessi Flosi út tónlistarmyndband í dag en þar sést hann meðal annars halda á þessu seðlabúnti. Þá er hann klæddur í afar dýrar flíkur frá tískuhúsum á borð við Gucci en ásamt því skartar hann skartgripum sem virðast mjög dýrir.

Í myndbandinu keyrir Flosi um á tveimur lúxus bílum, annars vegar hvítri Porche-bifreið af gerðinni Panamera og hins vegar rauðum Range Rover. Í laginu syngur hann síðan línur eins og „Ég þarf ekki að borga skatt“ og „Er að græða fokking gróft, færi pening inn á bankabók“.

Myndbandið má sjá hér fyrir neðan en lagið er einnig að finna á Spotify: