Alda Karen Hjaltalín, vakti mikla athygli í fyrra sem fyrirlesari, þá aðallega fyrir það að segja fólki að kyssa peninga. Þá vakti hún einnig athygli þegar hún kom með viskumolann „Þú ert nóg“ þegar hún hélt námskeiðið Life-Masterclass fyrir fullum Eldborgarsal í Hörpu. Þessi moli var afar umdeildur í netheimum en fólki fannst eins og hún væri að gera lítið úr vandamálum þeirra. Nú hefur Alda Karen snúið aftur með nýjan viskumola.
Þriðji Life Masterclass fyrirlesturinn
Alda opinberar þennan viskumola í myndbandi sem hún deilir á Instagram-síðu sinni í tengslum við nýjasta fyrirlestur sinn: Life Masterclass 3: Komdu þér á framfæri. Hún segir þetta vera fyrsta myndbandið af nokkrum sem hún ætlar að birta fyrir fyrirlesturinn sem, að hennar sögn, er að verða uppseldur. „Svona til að undirbúa fólkið sem er að koma og til að deila aðeins því sem við ætlum að tala um á fyrirlestrinum,“ segir Alda um ástæðuna fyrir því að hún ætlar að birtta myndböndin
„Meistarar borða gagnrýni í morgunmat“
„Meistarar borða gagnrýni í morgunmat,“ er viskumolinn sem Alda kynnir í þessu myndbandi. Hún fer síðan yfir þær þrjár tegundir af gagnrýni sem eru til. Það er uppbyggileg gagnrýni, neikvæð gagnrýni og sjálfsgagnrýni.
Sjálfsgagnrýnin er mikilvægasta tegundin af gagnrýni samkvæmt Öldu. „Það er ekkert verra en að henda sínum eigin skít í sitt eigin andlit,“ segir Alda og ítrekar miklvægi þess að sjálfsgagnrýnin okkar sé uppbyggileg en ekki neikvæð.
Myndbandið í heild sinni má sjá hér fyrir neðan.
