„Smurostar eru gerðir úr afgöngum og osti sem ekki var nægilega fínn fyrir stykki eða sneiðar sem eru bræddir saman. Þarna eru oft harðir endar, ostar sem höfðu of stórt ör eftir að mygla var skorin burt etc.“
Þetta segir einn notandi á íslenska Reddit en þar má finna þráð þar sem notendur eru spurðir hvort þeir geti upplýst um leyndarmál af fyrri vinnustað. Sögurnar sem þar koma fram eru misjafnar og óstaðfestar en þó áhugaverðar. Sögurnar fjalla um allt frá gæðum bíópopps til hvers vegna ekki sé boðið upp á kaffi í sumum bönkum.
Einn notandi segir að ekki sé alveg hægt að taka mark á skilaboðum frá Domino´s. „Þegar þú færð „pizzan þín er komin í ofninn“ skilaboð frá Domino’s, þá er alls ekki víst að pizzan þín sé komin í ofninn í alvöru. Pizzubakararnir „slá út“ pizzurnar oft um leið og þeir eru búnir að leggja áleggið á minnið, til að ná betri meðaltíma,“ segir notandinn.
Annar notandi segir raunar jákvæða frásögn af íslenskum pylsum. „Það er miklu betra innihald í pylsum en ég hélt. Engar steikur svosem, en ekkert algjört ógeð. en síðan bara hlaupefni og vatn og eitthvað svoleiðis. Smur-álegg sem innihalda „skinku“ hinsvegar eru algjör viðbjóður,“ segir sá notandi.
Hann skýrir svo betur hvað hann á við með að smur-álegg sé „viðbjóður“. „Smurostur með skinku og/eða beikonosti og einhver skrítin skinkusmyrja í túpu, og allt þetta drasl sem kemur í svona bauk sem maður smyr með hnífi á brauð. Ef það er með „kjöti“ þá er „kjötið“ af verstu sort. Ekki af gólfinu eða eitthvað, alls ekki, en bara svona drasl sem færi annars í ruslið,“ segir þessi notandi.
Aðrir notendur taka undir og segja að þeir borði enn pylsur þó þeir vinni við að búa þær til. Einn virðist þó ekki á því máli. „Pylsugerðin í sláturfélagi Suðurlands er endastöð fyrir beikon og áleggsafganga, pylsur sem eru ekki nógu góðar til að selja eru settar aftur í hræruna og fá bara að vera með í næstu hræru. Skemmtilegast er hinsvegar að segja frá því að allt grænmeti í 1944 réttunum, er ódýrt grænmeti frá Hollandi,“ segir sá.
Íslenskir notendur Reddit virðast margir hafa unnið með kjöt því samkvæmt sumum er pottur brotinn í kjötborðum. „„Ferska“ kjötið í kjötborði Hagkaups kemur flest allt frosið og er látið þiðna yfir nótt í volgu herbergi. Einnig eru elduð rif geymd við hlið hrátt kjöts,“ segir einn.
Annar notandi segir svo: „Við þetta má svo bæta að megnið af „ferska“ kjötinu í kjötborðinu er erlent. Hingað til hefur matvælalöggjöfin verið þannig að frysta þarf erlent kjöt í X langan tíma áður en það fer í verslanir, minnir að það hafi verið einhverjar 2-4 vikur. Nú á hins vegar að fella þetta ákvæði niður og í kjölfarið hefur risið upp hópur fólks sem lætur eins og þetta muni stráfella þjóðina – gjörsamlega óafvitandi að það hefur verið að éta erlent kjöt öll þessi ár,“ segir sá.
Einn notandi segist hafa verið starfsmaður í bankaútibúi stuttu eftir hrun. „Ástæðan af hverju við hættum með kaffi var ekki vegna þess að við erum að „spara“ heldur af því að brjálaður viðskiptavinur skvetti (sem betur fer volgu) kaffi á starfsmann. Svo sem ekkert mega leyndarmál, en vorum ekkert að auglýsa hvað viðskiptavinir gætu hugsanlega notað sem „vopn“ gegn okkur,“ segir sá.
Fleiri frásagnir eru svo um mat, til að mynda bíópopp. „Popp í bíói er gjarna síðan í gær, sérstaklega á fyrstu sýningum dagsins. Dagsgamalt popp er samt MIKLU MIKLU MIKLU betra en nýpoppað,“ segir þessi fyrrverandi bíóstarfsmaður.
Svo er einn sem segist hafa unnið í Leifsstöð. „Ég vann sem yfirmaður þjónustuaðila ónefnd flugfélags upp á Keflavíkurflugvelli. Það eru öllum drullusama um töskuna þína. Þegar það kemur að því að pakka mörg hundruð töskum í eina flugvél (hvað þá tugi af þeim) á innan við klukkutíma þá er þeim sko kastað. Taskan þín og þínir verðmunir eru ódýrari fyrir flugfélagið en seinkunin sem því veldur að passa upp á töskuna þína,“ segir sá.
Hér hafa ekki allar sögurnar úr þræðinum verið endursagðar en þráðinn má sjá hér.
