Sambandsþing SUS fór fram á Akureyri helgina 20. – 22. september 2019. Ungir Sjálfstæðismenn greina frá þessu á Twitter síðu sinni með myndbandi sem sýnir það helsta sem fór fram á þinginu. Ungu Sjálfstæðismennirnir skelltu sér á Hótel KEA á Akureyri og fóru í svokallaða vísindaferð til Samherja.
Vísindaferðir háskólanna eru oft þekktar sem eins konar djammferðir með dassi af fróðleik í leiðinni. Yfirleitt bjóða fyrirtækin upp á áfengi. Oft er farið í þessar ferðir með því markmiði að tengjast atvinnulífinu. Svo virðist því vera sem Ungir Sjálfstæðismenn hafi náð að tengjast einhverjum böndum við Samherjamenn í ferðinni því ekkert hefur heyrst frá þeim vegna Samherjamálsins í kjölfar umfjöllunarinnar um málið.
Bent hefur verið á þetta á Twitter en kona nokkur á forritinu birtir skjáskot af nýjustu tístum ungliðahreyfingarinnar. „Algjör þögn um Samherjamálið,“ segir hún. „Gott að sjá unga, upprenanndi Sjálfstæðismenn sem að kunna að þegja um eitt rosalegasta spillingarmál Íslands. Munu taka við flokknum með stæl.“
Hér fyrir neðan má sjá myndbandið frá ferð Ungu Sjálfstæðismannanna í Samherja. Í myndbandinu má meðal annars sjá forystumenn í ungliðahreyfingunni skemmta sér með Þorsteini Má, sem sagði af sér sem forstjóri Samherja í kjölfar Samherjamálsins.
45. sambandsþing SUS fór fram á Akureyri helgina 20. – 22. september 2019. Myndbandið sýnir það helsta sem fór fram á þinginu. Málefnastarf á Hótel KEA, vísindaferðir til Samherja og Norðurorku 🦅 pic.twitter.com/LMrYxbW3Fm
— Ungir sjálfstæðism. (@ungirxd) October 9, 2019