Hinn þekkti veitingamaður Jón Mýrdal var hætt kominn fyrir ári síðan en þá var hann skorinn upp fyrir heilaæxli. Man hann ekkert eftir sjálfum sér frá þessu skeiði. Jón birtir meðfylgjandi myndir á Facebook-síðu sinni og minnist þess að ár er liðið frá þessum örlagaríka atburði. Hann getur þess einnig að hann hefur selt veitingastaðinn Messann og opnar nýjan veitingastað og bar í næstu viku:
„Í gær var stór afmælisdagur hjá mér en þá var ár síðan farið var með mig gufuruglaðan á bráðamóttökuna og ég myndaður og sítrónustórt heilaæxli kom í ljós. Ég var tekinn í bráðaheilauppskurð samdægurs og æxlið var fjarlægt. Ég man ekkert eftir þessu né seinustu 2-3 vikum fyrir uppskurð. Það er á þessum stundum sem maður þakkar fyrir góða fjölskyldu og trausta vini. Ég væri ekki á lífi ef það væri ekki fyrir ykkur kæra fólk. Minnsta álagið var á mér í þessu öllu enda alveg útá túni og man ekkert. Þetta ár hefur aðallega farið í að ná fullri heilsu og gengur það mjög vel og hefur eftirlit með mér verið minnkað og þarf ég bara að mæta í heilamyndatöku einu sinni á ári. Það eru breytingar í vændum og hef ég selt Messann en kem til með að opna nýjan bar og veitingastað í næstu viku. Hægt verður að lesa um það í Fréttablaðinu um helgina.“