„Fólk úr litlum bæjarfélögum er yfirleitt vingjarnlegra,“ segir Eliza Reid, forsetafrú Íslands, en hún var gestur í bandaríska spjallþættinum The Social.

Eliza segir að leið hennar að Bessastöðum hafi byrjað á blindu stefnumóti, þegar þau Guðni voru saman í skóla í Bretlandi. Bætir hún við að hún hafi svo sannarlega lagt sitt af mörkunum til að tryggja stefnumót við núverandi Íslandsforseta.

„Kvöld eitt var söfnun og karlmennirnir röðuðu upp bollum úr frauðplasti og hver bolli var merktur einum einstaklingi. Við konurnar áttum að kaupa miða og merkja miðana með okkar eigin nöfnum og síðan setja þá í mismunandi bolla. Þá áttu mennirnir að draga upp nafn af handahófi og þurftu síðan, í kjölfarið, að bjóða út þeirri dömu sem var dregin upp,“ segir Eliza.

„Mér þótti þessi Íslendingur heillandi og skemmtilegur, þannig að ég keypti tíu miða og setti átta í bollann hans. Ég var viss um að ég kæmi út eins og eltihrellir ef ég setti alla tíu, en líkurnar voru mér hagstæðar.“

Eliza segist einnig hafa sýnt frumkvæði mörgum árum síðar þegar kom að bónorðinu. „Það er rétt, ég bað hans,“ segir Eliza.

„Ég hef rödd, ég er ákveðin manneskja. Þegar ég sagðist vilja gifta mig þá lét ég hann bara vita af því.“

Viðtalið má sjá í heild sinni að neðan.