Söng- og leikkonan Salka Sól Eyfeld segist lengi hafa hætt að rappa eftir að ónefndur grínisti hjólaði í hana á Twitter fyrir nokkrum árum.

Þetta segir Salka á Twitter en nokkur umræða hefur verið um óvægið grín eftir að Reykjavíkurdætur svöruðu fyrir sig þar. Það kom í kjölfar brandara uppistandarans Önnu Svövu Knútsdóttir um hljómsveitina.

„Einu sinni sagði uppistandari á twitter að rappið mitt væri það versta sem hafði komið fyrir íslenska menningu. Ég man hvað ég tók það inná mig að fór að missa áhugann á því að rappa. Gerði ekkert rapp þangað til Falafel með Arnari síðasta sumar,“ skrifar Salka Sól.

Hún bætir við þetta að hún hafi lengi ekki viðurkennt fyrir sjálfri sér hve sár hún hafi verið yfir þessum ummælum. „Ég þorði ekki að viðurkenna hvað ég varð í raun sár yfir þessum ummælum og vildi að ég hefði verið sterkari á þessum tíma og bara leitt þetta framhjá mér,“ segir Salka.