Björk Eiðsdóttir, ritstýra Glamour og umsjónarkona Lífsins í Fréttablaðinu, og Karl Ægir Karlsson, doktor í taugavísindum og prófessor í Háskólanum í Reykjavík, eignuðust dreng á þriðjudaginn, þann 7. maí.

Snáðinn er fyrsta barn Bjarkar og Karls saman en fyrir á Björk þrjú börn og Karl einnig þrjú. Þessi stóra fjölskylda stækkaði því enn meira í vikunni.

Björk tilkynnir gleðifregnirnar á samfélagsmiðlum og er greinilega í skýjunum með nýjustu viðbótina í fjölskylduna.

„Heilbrigður dásemdardrengur heiðraði okkur skötuhjú með komu sinni í heiminn í gær, 7. maí. Hann er elskaður og dáður af öllum; foreldrum og stórum systkinahópi. Bikar okkar er barmafullur!“ skrifar Björk og hamingjuóskum rignir yfir parið.

Fókus óskar Björk, Karli og hinum börnunum sex innilega til hamingju með nýjasta fjölskyldumeðliminn.