Kristborg Bóel Steindórsdóttir og Kolbrún Pálína Helgadóttir eiga það sameiginlegt að hafa gengið í gegnum skilnað og skrifaði sú fyrrnefnda bókina 261 dagur um eigin skilnað, bókin kom út í vor og vakti mikla athygli.
Og nú hafa þær skrifað undir samning við Sagafilm um framleiðslu sjónvarpsþátta, sem verða sex talsins og sýndir í Sjónvarpi Símans.
Í viðtali við Morgunblaðið kemur fram að þær þær hafi ákveðið að gera þessa þætti þar sem þeim fannst vanta fræðandi efni um hjónaskilnaði.
„Það er í raun ekki til neitt alvöru stoðkerfi fyrir fólk sem er að skilja. Hvort sem um er að ræða andlega aðstoð eða lagalega. Fólk missir oft og tíðum algjörlega fæturna í svona ferli og hefur sama og engan styrk til að takast á við hlutina eða taka réttar ákvarðanir. Um er að ræða algjöran viðsnúning á lífinu oft og tíðum, áföll og sorg sem erfitt er að fá viðurkennda og því fylgir oft mikil örvænting,“ segir Kolbrún Pálína.
„Skilnaðir eru mjög algengir á Íslandi og hver og einn þeirra snertir marga, svo sem börn, fjölskyldu og vini þeirra sem fara í sundur. Það er mín skoðun að þættir sem þessir eigi svo sannarlega rétt á sér, en það er alltaf gott að geta tengt við íslenskan raunveruleika. Við munum vinna þetta faglega og fá sérfræðinga í lið með okkur í bland við Jón og Gunnu sem hafa gengið í gegnum þessa reynslu,“ segir Kristborg Bóel.
Hvað lærðuð þið af því að skilja sjálfar?
„Að bera virðingu fyrir ferlinu, að játa vanmátt sinn, að njóta þroskans og fagna hverju skrefi í átt að hamingjunni á ný. Að óttast ekkert, að dæma engan, fylgja hjartanu og lifa fyrir sig,“ segir Kolbrún Pálína og Kristborg Bóel bætir við:
„Það er mikið þroskaferli að skilja og ef maður tæklar það rétt kemur maður út úr því sem sterkari einstaklingur myndi ég halda. Það sem ég hef helst lært er að það er ekki hægt að flýta þessu ferli, það verður bara að fá að hafa sinn gang.“
