Söngvarinn Rúnar Þór Pétursson átti 65 ára afmæli þann 21. september síðastliðinn. Af því tilefni ákváðu börn hans að útbúa sérstaka afmæliskveðju til hans.
Fóru fimm þeirra í stúdíó og tóku upp lag sem Alda dóttir Rúnars samdi þegar hún var 16 ára. Þórir Úlfarsson stjórnaði upptökum og útsetti.
„Glöggir hlustendur taka kannski eftir að ég komst ekki á sama tíma og þau í stúdíóið svo ekki náðist myndband af mér að syngja þar, svo því var bara reddað,“ segir Aron Leví Beck, sonur Rúnars Þórs og varaborgarfulltrúi Samfylkingarinnar.
Hin systkinin sem syngja ásamt Öldu, heita Egill Ýmir, Gulla Hólm og Hergeir Már.
Og í lokin skila Atli og Freyja kveðju til föður síns. „Þau komust því miður ekki með í upptökur, en syngja bæði mjög vel,“ segir Aron.
Systkinin munu koma fram á tónleikum Rúnars Þórs í Bæjarbíói þann 29. nóvember.
