Sérfræðingar hjá bæði St Leonard heilsustofnuninni og Háskólanum í Exeter í Bretlandi greindu niðurstöður úr 22 rannsóknum sem gerðar voru í níu mismunandi löndum með ólíkum heilbrigðiskerfum.
Af þessum 22 rannsóknum leiddu átján í ljós að lífslíkur aukast til muna hjá þeim sem halda sig við sama lækninn. Jafnvel um helming.
Ávinningurinn af því að hitta alltaf sama lækninn gilti ekki einungis um heimilslækna heldur einnig um sérfræðinga á borð við skurðlækna og geðlækna og þá var jafnframt tekið tillit til þess að fólk sem býr við lélega heilsu þarf oft að leita til margra lækna.
Rannsóknirnar sýndu með yfirgnæfandi hætti að sjúklingar sem hitta sömu læknana með reglulegu millibili eru mun líklegri til að fylgja ráðleggingum þeirra og taka upp forvarnaraðgerðir. Þá var einnig sýnt fram á að þetta fólk er með umtalsvert færri innlagnir á sjúkrahús.
„Þegar sjúklingur hittir lækni sem hann/hún þekkir og líkar vel við þá er viðkomandi líklegri til að tala með hispurslausari hætti um heilsufar sitt og gefa þannig lækninum upplýsingar sem geta ráðið úrslitum. Læknirinn fær þá jafnframt tækifæri til þess að miðla lausnum til sjúklingsins með mikið meiri nákvæmni,“ segir Dr. Pereia Gray sem fór fyrir rannsókninni.
Mikilvægi þess að sjúklingar hafi samfellt aðgengi að sömu læknum er alvarlega vanmetið í heilbrigðiskerfinu,“ segir Gray.
„Hingað til hefur aðallega verið litið á þetta sem þægindi fyrir sjúklinga en nú er orðið ljóst að málið snýst einnig um gæði læknishjálparinnar.“
