Sara Björk Gunnarsdóttir, landsliðskona í knattspyrnu og Þýskalands- og bikarmeistari með Wolfsburg, undirritaði nýlega samstarfssamning við Heklu. Sara Björk, sem mætti ásamt liðsfélögum sínum, landsliði Brasilíu á Laugardalsvelli fyrr í vikunni áritaði myndir og keppnistreyjur hjá Heklu þegar samningurinn var undirritaður, auk þess sem hún spjallaði við gesti og gangandi.

Mynd: Heiða Helgadóttir

„Við erum afar stolt af íslensku fótboltastelpunum okkar og höfum mikla trú á þeim. Við erum því einstaklega ánægð með samstarfssamninginn við Söru Björk sem er frábær fyrirmynd,“ segir Jóhann Ingi Magnússon sölustjóri Volkswagen.

Samstarfssamningurinn felur í sér margvíslegt samstarf þessara tveggja aðila, en megintilgangurinn er engu að síður beinn og óbeinn stuðningur við Söru Björk. Hekla telur mikilvægt að styðja við íslenska kvennaknattspyrnu og íslenskar knattspyrnukonur. Sara Björk er sannur leiðtogi innan vallar sem utan og er fyrirmynd fjölmargra. Með stuðningi við hana vonast Hekla til að stuðla að áframhaldandi frábærum árangri Söru Bjarkar og félaga hennar.

„Það er mér mikil ánægja að geta kynnt samstarf við Heklu á Íslandi. Ég keyri um á Volkswagen út í Þýskalandi og nú líka þegar ég er hérna á Íslandi,“ segir Sara Björk Gunnarsdóttir og hvetur alla til að mæta á völlinn þegar hvetja þarf íslensku landsliðin til dáða.

Hekla býður Söru Björk velkomna í Volkswagen fjölskylduna á Íslandi og hlakkar til samstarfsins í framtíðinni.

Áfram Ísland!