Það kom Svarthöfða ekki mikið á óvart þegar fregnir bárust af því að Sjálfstæðisflokkurinn skoðar nú að flytja höfuðstöðvar sínar úr Valhöll við Háaleitisbraut. Flokkurinn hefur skroppið mjög saman á undanförnum árum og ætli það sé ekki óhætt að segja að flokkurinn sé kominn í sömu stöðu og flestir kjósendur hans. Ævikvöldið er fram undan, ungarnir flognir úr hreiðrinu og ekkert annað að gera en að minnka verulega við sig húsakostinn, jafnvel fara í þjónustuíbúð eða sækja um á hjúkrunarheimili.
Kannski er hugmyndin sú að flytja skrifstofur flokksins í Hveragerði. Þar er stutt í heilsustofnun Náttúrulækningafélagsins og svo ert formaðurinn náttúrlega úr Hveragerði og býr þar. Í góðviðrinu í gær brá Svarthöfði undir sig betri fætinum og fór austur fyrir fjall. Ekki sá hann betur betur en flaggað væri við skrifstofu flokksins í Hveragerði og vart var þverfótað fyrir Sjálfstæðismönnum í bænum. Svarthöfði sá ekki betur en að framkvæmdastjóri flokksins væri á svæðinu með bleikan Kjörís.
Svarthöfði hefur þó ekki trú á því að framtíðarhöfuðstöðvar Sjálfstæðismanna verði í Hveragerði. Ágætt getur verið að flytja sig þangað í skamman tíma, fara kannski á heilsustofnunina til að koma sér í stand, en varla verður flokkurinn þar til langframa. Svo eru Sjálfstæðismenn vitaskuld í minnihluta í bænum og varla vilja þeir hafa höfuðstöðvarnar í svoleiðis sveitarfélagi.
Svarthöfði hefur heyrt því fleygt að Norðanmenn horfi nú til þess að flokkurinn flytji sig til Akureyrar. Varla myndi varaformaður flokksins, þingmaður Samherja, setja sig upp á móti því. Þessi niðurstaða er samt ekki mjög líkleg, enda staða flokksins einstaklega bágborin á þessum slóðum. Skemmst er þess að minnast að í nýlegri skoðanakönnun kom í ljós að einungis átta prósent kjósenda á Norðurlandi styðja Sjálfstæðisflokkinn.
Svarthöfði hefur þó fulla trú á því að Sjálfstæðisflokkurinn muni flytja höfuðstöðvar sínar frá Reykjavík. Það er einfaldlega of sársaukafullt fyrir flokkinn að í þessu forðum höfuðvígi hans er hann rúinn trausti og fylgi og situr áhrifalaus í minnihluta. Fátt bendir til þess að það breytist.
Svarthöfði telur Sjálfstæðismenn í raun eiga einn kost þegar kemur að vali á nýjum höfuðstöðvum. Það verður auðvitað að vera á höfuðborgarsvæðinu og þar á flokkurinn aðeins eitt vígi eftir. Það er hinn blái og bjarti Garðabær. Alls staðar annars staðar á höfuðborgarsvæðinu eru allar líkur á því að flokkurinn lendi í minnihluta eftir sveitarstjórnarkosningarnar sem verða í maí á næsta ári. Garðabær klikkar ekki.
Svarthöfði áttar sig líka á því hver hin raunverulega ástæða fyrir fyrirhuguðum flutningi höfuðstöðva Sjálfstæðisflokksins er. Nú eru risnar blokkir á Valhallarreitnum og Sjálfstæðisflokkurinn græddi hálfan milljarð á því að þétta byggðina þar. Nú geta Sjálfstæðismenn rifið Valhöll og þétt byggðina enn frekar og grætt annan hálfan milljarð eða heilan. Svo geta þeir bara grillað í kvöldsólinni í Garðabæ.
