Enn versnar það hjá Guðrúnu Hafsteinsdóttur og Sjálfstæðisflokknum. Flokkurinn, sem fékk sína verstu útreið í tæplega aldarlangri sögu sinni í kosningunum fyrir tæpu ári, hefur haldið áfram að minnka og mælist nú svipaður að stærð og Miðflokkurinn – orðinn svo lítill að Valhöll er orðin allt of stór fyrir hann. Málþófið í vor og sumar tætti fylgið af flokknum og varð þingmönnum hans og forystu til mikillar minnkunar. Um helgina átti að peppa flokksmenn upp á fundi sem smalað var mikið á. Flestir bjuggust við að einhver tíðindi yrðu þar. Svo reyndist ekki vera. Skilaboðin voru þau að flokkurinn myndi kynna stefnu sína – bráðum – og svo fengu fundarmenn að sjá fótósjoppaða útgáfu af Sjálfstæðisfálkanum gamla.
Það var svo í morgun að Maskína birti skoðanakönnun um frammistöðu flokksformanna. Valkyrjurnar fá fínar niðurstöður og sér í lagi Kristrún Frostadóttir, sem 60% telja að hafi staðið sig vel. Hrifningin af frammistöðu stjórnarandstöðunnar er heldur hófstilltari, svo vægt sé til orða tekið. 61% telja að Sigmundur Davíð Gunnlaugsson og Guðrún Hafsteinsdóttir hafi staðið sig illa á þessu kjörtímabili og 58% að Sigurður Ingi Jóhannsson hafi staðið sig illa.
Guðrún Hafsteinsdóttir fær jákvæða einkunn hjá 14 prósentum, Sigmundur Davíð hjá 21% og Sigurður Ingi hjá 12%. Guðrún nýtur því hins vafasama heiðurs að vera með óhagstæðasta frammistöðuhlutfallið þegar stuðningsmenn allra flokka eru spurðir.
Orðið á götunni er að öllu meira áhyggjuefni fyrir Guðrúnu sé að Sjálfstæðismenn skiptast í næstum jafn stórar fylkingar í afstöðu sinni til frammistöðu hennar. Rétt um 30% eru ánægðir með hana. Tæplega 40% telja hana í meðallagi. En 31% Sjálfstæðismanna telja Guðrúnu hafa staðið sig illa á kjörtímabilinu. Þetta eru ekki góðar fréttir fyrir formann sem setið hefur í rúmt hálft ár og rétt um hálft ár til sveitarstjórnarkosninga.
Orðið á götunni er að mjög athyglisvert sé að staða Sigurðar Inga í Framsókn sé mun sterkari en staða Guðrúnar í Sjálfstæðisflokknum. Þó er Sigurður Ingi búinn að vera formaður í tæpan áratug og hefur verið gerður persónulega ábyrgur fyrir afhroði flokksins í síðustu kosningum. Góður meirihluti Framsóknarmanna telur sinn fráfarandi formann hafa staðið sig vel en minnihluti Sjálfstæðismanna er sömu skoðunar um nýjan formann flokksins. Þá telur mikill meirihluti Miðflokksmanna Sigmund Davíð hafa staðið sig vel þótt kjósendur annarra flokka sé síður hrifnir, nema kannski helst Sjálfstæðismenn, en álíka margir Sjálfstæðismenn eru ánægðir með frammistöðu Sigmundar Davíðs og þeir sem eru ánægðir með frammistöðu Guðrúnar.
Orðið á götunni er að úr þessari könnun megi lesa að tiltekinn hópur kjósenda togist á milli Sjálfstæðisflokks og Miðflokks og talsverður straumur hafi einmitt legið frá Sjálfstæðisflokknum til Miðflokksins það sem af er þessu kjörtímabili. Miðflokkurinn höfði betur en Sjálfstæðisflokkurinn til þeirra sem eru yst úti á hægri kanti skoðanarófsins; hefur sem sagt vinninginn, líkt og aðrar skoðanakannanir hafa ítrekað sýnt.
Orðið á götunni er að þetta síðastnefnda sé sérstakt áhyggjuefni fyrir Guðrúnu Hafsteinsdóttur og Sjálfstæðisflokkinn. Flokkurinn hefur nefnilega reynt sitt ýtrasta til þess að ná öfgahægrifylginu frá Miðflokknum en án árangurs. Ekki hefur flokkurinn reynt að sækja inn á miðjuna þar sem þorra kjósenda er að finna. Þess í stað kýs Sjálfstæðisflokkurinn að hoppa í sama drullupolli og Miðflokkurinn og fjarlægist æ meir sinn gamla sess sem fjöldahreyfing með margar vistarverur sem rúmað gátu breitt svið skoðana.
Orðið á götunni er að Guðrún Hafsteinsdóttir átti sig ekki á stöðu sinni eða flokksins. Hún átti sig ekki á því að kjósendur sjá að Sjálfstæðisflokkurinn hefur yfirgefið sínar grunnhugsjónir og er ekki lengur það forystuafl sem áður var. Flokkurinn sem stærði sig af stétt með stétt stendur nú vörðinn fyrir fordekraða yfirstétt. Flokkurinn sem var í fararbroddi fyrir þátttöku Íslands í samstarfi vestrænna lýðræðisríkja hefur nú skipað sér í sveit með öfgafólki sem vill loka landinu og loka sem mest á samstarf við aðrar lýðræðisþjóðir. Kjósendur VG, sem þurrkaðist af þingi í síðustu kosningum, þurfa ekki að örvænta. Fulltrúar þess afturhalds sem VG stóð fyrir sitja enn á Alþingi undir merki Sjálfstæðisflokksins og fótósjoppuðum fálkanum
Orðið á götunni er að með sama áframhaldi verði þess vart langt að bíða að enn bætist í formannatal Sjálfstæðisflokksins.
