Neytendur hafa tekið nýju lágvöruverðsversluninni, Prís, fagnandi, enda hljóta þeir að fagna samkeppni, fjölbreytni og lægra verði. Breki Karlsson, formaður Neytendasamtakanna, telur mikilvægt að Samkeppniseftirlitið skoði vandlega hvort milliliðir, heildsalarnir, séu að leggja steina í götu Prís með því að jafnvel neita versluninni um vörur. Hann fagnar þeirri aðferðafræði Prís að fara fram hjá heildsölum og flytja beint inn. Breki er gestur Ólafs Arnarsonar í hlaðvarpi Markaðarins á Eyjunni.
Markaðurinn - Breki Karlsson - 6.mp4
„Ég kíkti þangað og það virðist vera sem neytendur taki þessu fagnandi þar sem það var troðfullt út úr dyrum um miðjan dag á virkum degi þegar flestir eru í vinnunni sem er frábært og við fögnum þessari samkeppni en gjöldum mikinn varhug við þessum orðum sem við erum að heyra frá þeim um að milliliðirnir, heildsalarnir, séu að leggja steina í götu þeirra og jafnvel neita að afhenda þeim vörur og slíkt. Það er stóralvarlegt mál sem ég vona að Samkeppniseftirlitið skoði gaumgæfilega,“ segir Breki.
Þar er verkefni fyrir Samkeppniseftirlitið, þar hafa þeir hlutverki að gegna.
„Algerlega, en mér sýnist aðferðafræðin hjá Prís, ef ég skil það sem ég hef heyrt í fjölmiðlum rétt, að þau séu að fara fram hjá þessum milliliðum eins og þau geta og það er bara hið besta mál. Það er það sem öll stafræn tækni snýst um – að kötta út alla milliliðina – og ég vona að þau haldi áfram og veiti góða samkeppni. Þau hafa sagt að þau séu að niðurgreiða einhverjar vörur …“
Það er greinilegt að það er mikill metnaður þarna, það eru áform um stóra hluti vegna þess að hluti af þessari byrjunarfjárfestingu er að niðurgreiða ákveðna hluti til þess að ná sér stöðu á markaðnum og sem nýr aðili – smár aðili á markaði – þá mega þau gera þetta. Þetta mætti Bónus ekki gera, þetta mætti Krónan ekki gera. Ég er búinn að fara tvisvar eða þrisvar og vöruúrvalið gefur mér sterklega til kynna að þeir séu að flytja inn beint og fara fram hjá.
„Algerlega, þarna eru vörumerki sem maður hefur ekki séð annars staðar, sem er hið besta mál. Bæði lægra verð en líka meiri fjölbreytni. Neytendur hljóta að fagna því, fagna samkeppninni, fagna fjölbreytninni og fagna lægra verði.“
