Davíð Oddsson, ritstjóri Morgunblaðsins, skrifar í Reykjavíkurbréf dagsins um þegar honum var ruglað saman við saklausan pípulagningamann fyrir margt löngu síðan.

Þetta var þegar Davíð var laganemi í Háskóla Íslands. Dag einn tók hann upp blað stúdenta og sá þar nafn sitt á forsíðunni.

„Davíð Oddsson, pissudúkka auðvaldsins, fær úthlutað lóð hjá borgarstjórnaríhaldinu“ var fyrirsögnin en á þessum árum var Sjálfstæðisflokkurinn einráður í borgarstjórninni.

„Ætla hefði mátt að þessi frétt kæmi viðkomandi þægilega á óvart. En hann þurfti að klóra sér í kollinum, bæði hratt og lengi, þar sem hann kom ekki fyrir sig að hafa sótt um lóð hjá borginni,“ segir Davíð. „Og eins var ástæða til að klóra sér í höfðinu og hugleiða hvernig hann ætlaði að fjármagna þessi herlegheit.“

Eftir sem áður

Viku seinna kom stúdentablaðið aftur út og þá kom skýring á málinu. Ungur pípulagningamaður að nafni Davíð Oddsson hafði heyrt af reiði blaðsins en hann sagði að hann hefði einfaldlega sótt um lóðina og fengið. Hann kæmi hins vegar ekkert nálægt stúdentapólitíkinni eða pólitík yfir höfuð.

„Stúdentablaðið bað viðkomandi afsökunar á mistökum blaðsins. En bætti svo við: „Davíð Oddsson, laganemi er eftir sem áður pissudúkka auðvaldsins.“