Vilhjálmur Birgisson, formaður Starfsgreinasambandsins og Verkalýðsfélags Akraness, lýsir ánægju sinni með það að Hvalur hf. hafi boðið starfsmönnum sínum vinnu í sumar þrátt fyrir að sett hafi verið á „tímabundið“ hvalveiðibann til 1. september.
Í færslu á Facebook skrifar Vilhjálmur að með þessu sé Hvalur að sjálfsögðu að tryggja sér mannskap í vinnu þegar „tímabundna“ veiðibannið rennur út um mánaðamótin.
Vilhjálmur segir einungis um dagvinnu að ræða og þær launatekjur séu aðeins brot af þeim tekjum sem starfsmenn hefðu haft ef „þetta ólöglega tímabundna hvalveiðibann hefði ekki komið til.“
Vilhjálmur telur ljóst að Hvalur sé að undirbúa margra milljarða skaðabótakröfu á hendur ríkinu, eina spurningin sé hversu há hún verði en það muni væntanlega ráðast af því hvort veiðarnar verði heimilaðar 1. september eða ekki.
Hann segir að fróðlegt verði að sjá viðbrögð Sjálfstæðisflokksins og Framsóknarflokksins ef matvælaráðherra heimilar ekki veiðar frá og með 1. september.
„Mitt mat er að ef veiðarnar verði ekki heimilaðar þá hljóti þetta ríkisstjórnarsamstarf að springa, annað er nánast útilokað,“ skrifar Vilhjálmur.